জনীয়া, ২২ অক্টোবৰ : বৃহস্পতিবাৰে বৰপেটাৰ কলগাছিয়াৰ নৱোদয় পুথিভঁড়াল প্ৰাংগনত সাংবাদিকৰ কৰ্মশালা আৰু বিশেষ সম্বৰ্ধনা অনুষ্ঠানৰ আয়োজন কৰা হয় । "সাম্প্ৰতিক পৰিস্থিতিত সাংবাদিকতাৰ ধাৰা, সাংবাদিকৰ দায়িত্ব আৰু কৰ্তব্য" বিষয়ক কৰ্মশালাখন উদ্বোধন কৰে প্ৰবীন সাংবাদিক হেলাল উদ্দিন আহমেদে । কৰ্মশালাৰ উদ্দেশ্য ব্যাখ্যা কৰে প্ৰেছ ইউনিয়নৰ সম্পাদক জাহিদুল ইছলামে । লগতে সহ-সম্পাদক মোজাম্মেল হুছেইনে সম্বৰ্ধনা অনুষ্ঠানটি পৰিচালনা কৰে ।
কৰ্মশালাৰ লগত সংগতি ৰাখি সমাজৰ বিভিন্ন দিশত অৱদান আগবঢ়োৱা ১৫ গৰাকী বিশিষ্ট ব্যক্তিক সম্বৰ্ধনা জ্ঞাপন কৰা হয় । সাংবাদিকৰ কৰ্মশালাত মুখ্য আলোচক হিচাপে উপস্থিত থাকে বৰপেটা জিলা তথ্য আৰু জনসংযোগ বিষয়া বিকাশ শৰ্মা । কলগাছিয়া প্ৰেছ ইউনিয়নৰ সভাপতি ছহিদুল ইছলামৰ পৌৰহিত্যত অনুষ্ঠিত বিশেষ সম্বৰ্ধনা অনুষ্ঠানটোত প্ৰবীন সাংবাদিক মৌলানা আব্দুল হামিদ, ৰেহেনা পাৰবিন(গুণমনি)ৰ লগতে ১৫ গৰাকী ব্যক্তিক সম্বৰ্ধনা পত্ৰ, ফুলাম গামোচা আদিৰে সম্বৰ্ধনা জনোৱা হয় ।
অনুষ্ঠানটোত নৱজ্যোতি মহাবিদ্যালয়ৰ অধ্যক্ষ ড৹ ছাহজাহান আলী আহমেদ, অৱসৰপ্ৰাপ্ত অধ্যক্ষ এম মোজাম্মেল হুছেইন, সাংবাদিক আলতাফ হুছেইনকে ধৰি অৰ্ধশতাধিক সাংবাদিক, সাহিত্যিক আদি উপস্থিত থাকে ।
লগতে পঢ়ক:মূল্যবৃদ্ধিৰ বিৰুদ্ধে বঙাইগাঁৱত চি পি আই (এম)ৰ প্ৰতিবাদ
