বৰপেটা, ১৮ মাৰ্চঃ মহাপুৰুষ শ্ৰীমন্ত শংকৰদেৱৰ একান্ত সংগী, প্ৰিয় শিষ্য শ্ৰীশ্ৰী মাধৱদেৱে স্থাপন কৰা ঐতিহ্যমণ্ডিত বৰপেটা সত্ৰত এতিয়া চলিছে ব্যাপক ব্যস্ততা ৷ অহা ২০ মাৰ্চ পৰা আৰম্ভ হ'বলগীয়া শ্ৰীকৃষ্ণৰ দৌল মহোৎসৱক লৈ এতিয়া সত্ৰত এইদৰে ব্যাপক ব্যস্ততা দেখিবলৈ পোৱা গৈছে ৷
উল্লেখ্য শ্ৰীকৃষ্ণৰ দৌলযাত্ৰাৰ লগত সংগতি ৰাখি বৰপেটাত আয়োজন কৰা হোলী মহোৎসৱৰ দেশৰ ভিতৰতে এক সুনাম আছে ৷ মহোৎসৱৰ সময়ত ৰাজ্যৰ লগতে বাহিৰৰ পৰাও একাংশ ভক্তই আহি ভিৰ কৰেহি নামনি অসমৰ জনপ্ৰিয় তথা মুখ্য ব্যৱসায়িক চহৰ বৰপেটাত ৷ বৰপেটা সত্ৰই আয়োজন কৰা দৌল মহোৎসৱ এইবেলি তিনিদিনীয়াকৈ অনু্ষ্ঠিত হ'ব বুলি জনাইছে সত্ৰ পৰিচালনা সমিতিৰ প্ৰাক্তন সম্পাদক মহানন্দ পাঠকে ৷
অহা ২০ মাৰ্চ পৰা আৰম্ভ হ'বলগীয়া শ্ৰীকৃষ্ণৰ দৌলযাত্ৰাক লৈ এতিয়া ব্যস্ত হৈ পৰিছে সত্ৰ পৰিচালনা সমিতি ৷ এইবেলি ২০ মাৰ্চত গোন্ধযাত্ৰা, ২১ মাৰ্চত ভৰ দৌল আৰু ২২ মাৰ্চত সুৱেৰী অনুষ্ঠিত হ'ব বুলি প্ৰকাশ কৰিছে সত্ৰ পৰিচালনা সমিতিৰ প্ৰাক্তন সম্পাদক মহানন্দ পাঠকে ।
দৌল মহোৎসৱ সুশৃংখলিতভাৱে পৰিচালনাৰ বাবে সেৱাদল গঠন কৰাৰ লগতে, দেশ বিদেশৰ বিভিন্ন প্ৰান্তৰ পৰা অহা ভক্ত দৰ্শনাৰ্থীসকলৰ থকা আৰু খোৱা মেলাৰ বাবে অতিথি ব্যৱস্থাপনা সাজু কৰি তোলা হৈছে ৷ উল্লেখ্য যে, বৰপেটাৰ হোলীত সুৱেৰীৰ দিনটোতে প্ৰাণ পাই উঠে সমগ্ৰ চহৰখন । সেইদিনটোতে হোলীগীত আৰু আবিৰৰ ৰঙেৰে উন্মনা হৈ পৰে সত্ৰনগৰী বৰপেটা । ইয়াকে লৈ সৰুৰ পৰা বৰজনালৈকে বৰ্তমান ব্যস্ত হৈ পৰিছে হোলীগীতৰ আখৰাত । বৰপেটাৰ প্ৰাণৰ উছৱ হোলীক আদৰনি জনাবলৈ সত্ৰৰ যুৱক যুৱতীৰ পৰা ডেকা, বুঢ়া সকলোৱে সত্ৰাধিকাৰ তথা জ্যেষ্ঠ আৰু অভিজ্ঞসকলৰ তত্বাৱধানত হোলীগীতৰ আখৰা আৰম্ভ কৰিছে । বৰ্তমানে হোলীগীতৰ সুৰত ন-ৰূপে প্ৰাণ পাই উঠিছে সত্ৰনগৰী বৰপেটা চহৰ ।
