বৰপেটা, ৩ জুনঃ কৰ’ণা মহামাৰীয়ে কঢ়িয়াই অনা আতংক আৰু লক ডাউনৰ ফলত আন প্ৰতিষ্ঠান সমূহৰ লগতে বিগত প্ৰায় আঢ়ৈ মাহ ধৰি বন্ধ হৈ আছে ৰাজ্যৰ সকলোবোৰ জিমনেচিয়াম চেন্টাৰ ৷ জীম সমুহ বন্ধ হৈ থকাৰ ফলত আৰ্থিক সংকটত ভুগিছে ৰাজ্যৰ প্ৰায় 50 হাজাৰ প্ৰশিক্ষক সকলৰ লগতে জিম সমূহৰ স্বত্তাধিকাৰসকল ৷ বিশেষকৈ বেংকৰ পৰা ঋণ লৈ বহু শিক্ষিত যুৱকে আৰম্ভ কৰা জীম ব্যৱসায় সন্মুখীন হৈছে ব্যাপক ক্ষতিৰ ৷ সেয়েহে সাৱধানতা অৱলম্বন কৰি তথা নীতি-নিৰ্দেশনা পালন কৰি জিমসমুহ খোলাৰ অনুমতি বিচাৰি চৰকাৰক অনুৰোধ জনাই বুধবাৰে প্ৰেছ ক্লাৱত এখন সংবাদমেলৰ আয়োজন কৰে বৰপেটাৰ একাংশ শৰীৰচৰ্চাবিদ আৰু জিমৰ গৰাকী আৰু প্ৰশিক্ষকসকলে ৷
সংবাদমেলত জিমৰ গৰাকী আৰু প্ৰশিক্ষক সকলৰ স্পষ্ট দাবী,বিগত প্ৰায় আঢ়ৈ মাহ ধৰি ব্যাপক ক্ষতিৰ সন্মুখীন হোৱা জিম সমূহক এই সংকটৰ পৰা ৰক্ষা কৰাৰ স্বাৰ্থত জিমসমুহ ৮ জুনৰ পৰা খোলাৰ অনুমতি প্ৰদান কৰক চৰকাৰে ৷ চৰকাৰে এফালে ফিট ইণ্ডিয়া মুভমেন্টৰ কথা আওৰাইছে আৰু আনফালে বৰ্তমানলৈকে শৰীৰ চৰ্চাৰ কেন্দ্ৰসমুহ বন্ধ কৰি ৰাখিছে বুলিও সংবাদমেলত অভিযোগ উত্থাপন কৰে জিমৰ গৰাকী আৰু প্ৰশিক্ষক সকলে ৷ লগতে সংবাদমেলৰ জৰিয়তে প্ৰশিক্ষক সকলে মন্তব্য কৰে যে,শৰীৰচৰ্চাৰ জৰিয়তে একোজন ব্যক্তিয়ে সুস্বাস্থ্যৰ গৰাকী হোৱাৰ লগতে ৰোগ প্ৰতিৰোধ ক্ষমতাও বৃদ্ধি কৰিব পাৰে ৷ আনহাতে জিমসমুহ বন্ধ হৈ পৰাৰ ফলত বিভিন্ন ৰাষ্ট্ৰীয় প্ৰতিযোগিতাত অংশগ্ৰহণ কৰিবলগীয়া শৰীৰচৰ্চাবিদ সকলো বঞ্চিত হৈ আছে অনুশীলনৰ পৰা ৷ এই সমূহ বিষয়লৈ দৃষ্টি নিক্ষেপ কৰি লগতে ৰাজ্যৰ ক্ৰীড়া ক্ষেত্ৰক কৰ’ণা ফলত পৰা প্ৰভাৱৰ পৰা মুক্ত কৰিবলৈ অতি শীঘ্ৰে এটা সিদ্ধান্ত ল’বলৈ চৰকাৰক অনুৰোধ জনায় জিমৰ প্ৰশিক্ষক সকলে ৷
