বৰপেটা, 27 এপ্ৰিল : হাউলী আৰক্ষী থানাৰ অন্তৰ্গত দাবালীয়াপাৰা গাঁৱৰ জাহেৰ আলীৰ 12 বছৰীয়া পুত্ৰ আশিক আলীক অপহৰণ কৰিবলৈ অহা তিনিজন যুৱকক স্থানীয় ৰাইজ আৰু আৰক্ষীৰ সহযোগত গ্ৰেপ্তাৰ হোৱা ঘটনাই অঞ্চলজুৰি তীব্ৰ চাঞ্চল্যৰ সৃষ্টি কৰিছে ৷
জানিব পৰা মতে, বৃহস্পতিবাৰে ৰাতিপুৱা 10 বজাত অচিনাকি তিনিজন যুৱকে নম্বৰ প্লেট বিহীন মাৰুতী গাড়ীৰে আহি আব্দুল মজিদ নামৰ এজন লোকক আশিক আলী সম্পৰ্কে বিতং জানিব বিচৰাত পৰিয়ালৰ লোকৰ মাজত সন্দেহৰ সৃষ্টি হয় | পিচত অচিনাকী যুৱক দুজনে তাৰ পৰা গুচি আহি দাৱালীয়াপাৰা চ'কত আশিকক অপহৰণ কৰাৰ বাবে দীৰ্ঘ সময় ধৰি খাপ পিটি থাকে ৷ যুৱক দুজনৰ চাল-চলনত সন্দেহ ওপজাত আশিকৰ মাক আনোৱাৰা খাতুনে ঘটনা সন্দৰ্ভত হাউলী আৰক্ষীক অৱগত কৰে ৷ হাউলী আৰক্ষীৰ বিশেষ তৎপৰতাত আৰু স্থানীয় ৰাইজৰ সহযোগত হাউলী বৰপেটা পথত গাড়ীৰ চালক সহ যুৱক দুজনক কৰায়ত্ব কৰিবলৈ সক্ষম হয় আৰক্ষী ৷
আটকাধীন যুৱক কেইজন হ'ল-মকিবুল ইছলাম, ছাদ্দাম আলী আৰু মহিদুল ইছলাম ৷ অপহৰণকাৰী কেইজনৰ বিৰুদ্ধে হাউলী আৰক্ষী থানাত ভাৰতীয় দণ্ডবিধি আইনৰ 365/511 ধাৰাত 173/19 নম্বৰৰ গোচৰ পঞ্জীয়ন কৰা হৈছে বুলি ভাৰপ্ৰাপ্ত আৰক্ষী বিষয়া চন্দন গোস্বামীয়ে জানিবলৈ দিয়ে ৷
