এন আৰ চিক লৈ বৰপেটাত নাই কোনো উৎসুকতা

৩১ জুলাইত প্ৰকাশ পাব এন আৰ চিৰ চূড়ান্ত তালিকা ৷ এন আৰ চিৰ চূড়ান্ত তালিকা প্ৰকাশৰ পূৰ্বে বুধবাৰে প্ৰকাশ পাইছে অতিৰিক্ত তালিকা ৷ বৰপেটাতো প্ৰকাশ পাইছে এন আৰ চিৰ খচৰাত নাম অন্তৰ্ভূক্ত হ'ব নলগা ব্যক্তিসকলকৰ অতিৰিক্ত তালিকা

বৰপেটা,২৬ জুনঃ সকলোবোৰ এন আৰ চি সেৱা কেন্দ্ৰৰ লগতে বৰপেটাতো প্ৰকাশ পাইছে এন আৰ চিৰ অতিৰিক্ত তালিকা ৷ পিছে অতিৰিক্ত তালিকাখনক লৈ বিশেষ উৎসুকতা পৰিলক্ষিত নহ'ল জিলাখনৰ লোকসকলৰ মাজত ৷ বুধবাৰে পুৱা দহ বজাৰ পৰাই এন আৰ চি সেৱা কেন্দ্ৰ সমূহত এন আৰ চিৰ কামত নিয়োজিত বিষয়াসকল উপস্থিত থাকে যদিও সেৱা কেন্দ্ৰসমূহত কোনো লোকৰ ভিৰ দেখিবলৈ পোৱা নগ'ল ৷ এই অতিৰিক্ত তালিকাত প্ৰতিটো সেৱা কেন্দ্ৰতে অতি নগণ্য সংখ্যক লোকৰ নামহে প্ৰকাশ পোৱা বুলি জানিবলৈ দিছে সেৱা কেন্দ্ৰসমূহত নিয়োজিত এন আৰ চিৰ বিষয়া সকলে ৷

ইপিনে জিলাখনত কিমান সংখ্যক লোকৰ নাম অতিৰিক্ত তালিকাত প্ৰকাশ পাইছে সেই সম্পৰ্কে কোনো তথ্য প্ৰকাশ কৰা নাই জিলা প্ৰশাসনে ৷ এই সম্পৰ্কীয় কোনো তথ্য জিলা প্ৰশাসনে ৰাজহুৱা নকৰে বুলি জানিবলৈ দিছে বৰপেটাৰ জিলা উপায়ুক্ত মুনীন্দ্ৰ শৰ্মাই ৷

আৰু পঢ়কঃ লখিমপুৰৰ সোনাপুৰ কেন্দ্ৰত অতিৰিক্ত খচৰাত বাদ পৰিল ১৩ জনৰ লোকৰ নাম