বৰপেটা, ২৮ আগষ্টঃ ২১ৰ নিৰ্বাচনক লৈ কংগ্ৰেছে বিৰোধী ৰাজনৈতিক দল সমুহক লৈ মহাজোঁটৰ কথা কৈ আছে যদিও আজিৰ তাৰিখত এআইইউডিএফৰ বাহিৰে কোনো দল আগবাঢ়ি অহা নাই কংগ্ৰেছৰে মিত্ৰতা গঢ়িবলৈ ৷
পিছে এআইইউডিএফৰ সৈতে প্ৰদেশ কংগ্ৰেছৰ নেতৃত্বই মিত্ৰতাৰ দিশে যিমানে আগবাঢ়িছে সিমানেই দলৰ কংগ্ৰেছৰ তৃণমূল পৰ্যায়ত বাঢ়িছে অসন্তুষ্টি ৷ হাইকামাণ্ডৰ নিৰ্দেশত প্ৰদেশ কংগ্ৰেছে এআইইউডিএফৰ সৈতে মিত্ৰতাৰে ২১ৰ নিৰ্বাচনত অৱতীৰ্ণ হোৱাৰ সম্ভাৱনা প্ৰবল হৈ পৰিছে যদিও আসন এৰি দিয়াক লৈ কংগ্ৰেছৰ মাজত এতিয়াৰে পৰাই আৰম্ভ হৈছে বিদ্ৰোহৰ উকমুকনি ৷
বৰপেটা জিলা কংগ্ৰেছৰ অধিকাংশ নেতাৰেই দাবী যে, বৰপেটাৰ কোনো এটা সমষ্টিয়েই এৰি দিব নোৱাৰিব এআইইউডিএফক ৷ আনকি একালৰ বাওঁ দূৰ্গ হিচাপে পৰিচিত সৰভোগ সমষ্টিটো চিপিআইএমক এৰি দিয়াৰ ক্ষেত্ৰতো আপত্তি বৰপেটা জিলা কংগ্ৰেছ নেতৃত্বৰ ৷ বৰপেটা বিধানসভা সমষ্টিৰ যোৱাবাৰৰ পৰাজিত প্ৰাৰ্থী তথা প্ৰদেশ কংগ্ৰেছৰ সম্পাদক আব্দুৰ ৰহিম আহমেদে অংকসহ বুজাই দিলে কি কাৰণত বৰপেটাৰ ৮ টা সমষ্টিৰ এটাও সমষ্টি এৰি দিবলৈ অপ্ৰস্তুত এআইইউডিএফক ৷ বিগত বিধানসভা, পঞ্চায়ত আৰু লোকসভা নিৰ্বাচনৰ ভোটৰ পেটাৰ্ণৰ কথা আঙুলিয়াই দি পূৰ্বৰ আমছুৰ সভাপতি তথা বৰ্তমানৰ প্ৰদেশ কংগ্ৰেছৰ নেতা আব্দুৰ ৰহিম আহমেদে বুজাই দিলে বৰপেটাত কংগ্ৰেছে অকলেই ৮ টা সমষ্টিত নিৰ্বাচনত অবতীৰ্ণ হোৱাত সক্ষম বুলি মন্তব্য কৰে ৷ একেই দাবী বৰপেটা জিলা কংগ্ৰেছৰ দুই জ্যেষ্ঠ নেতা তথা জিলা কংগ্ৰেছৰ সাধাৰণ সম্পাদক আনছাৰী আলী আহমেদ আৰু ৰুস্তম আলীৰো ৷ এই দুই জ্যেষ্ঠ নেতায়ো এ আই ইউ ডি এফক বৰপেটাৰ কোনো এটা সমষ্টি এৰি দিবলৈ অপ্ৰস্তুত ৷
বিজেপিক উৎখাতৰ স্বাৰ্থত মহাজোট বন্ধনৰ প্ৰতি আগ্ৰহী যদিও মিত্ৰতাৰ নামত বৰপেটাত এআইইউডিএফক সমষ্টি এৰি নিদিয়ে জিলা কংগ্ৰেছে ৷ আনকি কংগ্ৰেছৰ সাংগঠনিক ভেটি ক্ৰমাৎ সবল হৈ পৰা সৰভোগক লৈয়ো বৰপেটা জিলা কংগ্ৰেছে লৈছে আকোৰগোজ স্থিতি ৷ যিসময়ত বিজেপিৰ ৰাজ্যিক সভাপতি ৰঞ্জিৎ দাসে সৰভোগ এৰি আন সমষ্টিৰ সন্ধান কৰিবলগা হৈছে তেনেক্ষেত্ৰত সৰভোগ চিপিআইএমক এৰি দিবলৈ কোনোপধ্যেই ৰাজী নহয় বৰপেটা জিলা কংগ্ৰেছ নেতৃত্ব ৷
সেয়ে কংগ্ৰেছে আই ইউ ডি এফৰ মিত্ৰতা বা মহাজোট বন্ধনক লৈ প্ৰদেশ কংগ্ৰেছ যিমানেই আগবাঢ়িছে সিমানেই তৃণমূল পৰ্যায়ত বাঢ়িছে ক্ষোভ ৷ সেয়ে শেষ মুহূৰ্তত এ আই ইউ ডি এফৰে কিমান সফল হ'ব কংগ্ৰেছৰ মিত্ৰতা সেয়া সময়তহে লক্ষণীয় হ‘ব ৷
লগতে পঢ়ক : কৃষিকৰ্মৰে পৰিচয় দাঙি ধৰা আছু নেতাগৰাকী
