বাক্সা,১৪ মাৰ্চ: অসম বিধানসভাৰ তৃতীয় পৰ্যায়ত অনুষ্ঠিত হ'বলগীয়া ভৱানীপুৰ বিধানসভা সমষ্টিত অসম গণ পৰিষদৰ প্ৰক্ষেপিত প্ৰাৰ্থী ৰঞ্জিত ডেকাই বাক্সাৰ সাউদৰ ভিঠা, হুদুখাটা, শালবাৰী, আওঁহাটাকে ধৰি প্ৰায় কেইবাখনো গাঁৱত নিৰ্বাচনী প্ৰচাৰ চলায় । গ্ৰামাঞ্চলৰ যুৱ সমাজৰ লগত মত বিনিময় কৰি নিৰ্বাচনী ৰণকৌশল সম্পর্কে আলোচনা কৰে ডেকাই ।
এআইইউডিএফ-ৰ দখলত থকা ভৱানীপুৰ বিধানসভা সমষ্টি এইবাৰ মিত্ৰজোঁটৰ দখললৈ আহিব বুলি মত প্ৰকাশ কৰে ৰঞ্জিত ডেকাই ৷ লগতে তেওঁ কয়, অসমৰ অস্তিত্ব ৰক্ষাৰ সংগ্ৰামত প্ৰথম গৰাকী শ্বহীদ এই ভৱানীপুৰতেই হৈছিল । শ্বহীদৰ কেঁচা তেজৰ বিনিময়ত নিৰ্মিত অসম গণ পৰিষদ দলে প্ৰাৰ্থিত্ব প্ৰদান কৰাত সন্তুষ্টি প্ৰকাশ কৰে ডেকাই ৷
"ছাত্র অৱস্থাৰ পৰাই নিবিড়ভাৱে ৰাজনৈতিক সামাজিক কামত জড়িত হৈ আহিছো আৰু এতিয়া অসম গণ পৰিষদ দলৰ জৰিয়তে এই সমষ্টিৰ ৰাইজক সেৱা কৰিবলৈ পাই সন্তুষ্টি লাভ কৰিছো । অগপৰ লক্ষ্য এই অঞ্চলত উন্নয়ন সাধন কৰা"-অঞ্চলটোৰ যুৱ সমাজৰ লগত মত বিনিময় কৰাৰ পাচতে সাংবাদিকৰ আগত ৰঞ্জিত ডেকাই এইদৰে মন্তব্য প্ৰকাশ কৰে ৷
লগতে পঢ়ক: অগপৰ তৃতীয়খন প্ৰাৰ্থী তালিকা প্ৰকাশ
