স্পৰ্টছ ডেস্ক, 20 চেপ্তেম্বৰ : ছেমি ফাইনেলত কাজাখস্তানৰ দৌলেত নিয়াজবেকভৰ হাতত বজৰংগ পুনিয়াক পৰাস্ত ঘোষণা কৰাৰ পাছতে সংযুক্ত বিশ্ব মল্লযুঁজ সংস্থা চমুকৈ UWWৰ ওচৰ চাপিব ভাৰতীয় মল্লযুঁজ ফেডাৰেছন(WFI) ৷ এই সম্পৰ্কত WFI য়ে মন্তব্য কৰে যে,মেচ সন্দৰ্ভত পুনৰীক্ষণৰ বাবে আবেদন জনোৱা হৈছে আৰু UWWৰ অধ্যক্ষই এই সম্পৰ্কত বিশেষ গুৰুত্ব প্ৰদান কৰিব বুলি জানিবলৈ দিয়ে ৷
উল্লেখ্য যে,কোৱাৰ্টাৰ ফাইনেলত উত্তৰ কোৰিয়াৰ জং ছনক 8-1 ব্যৱধানত পৰাস্ত কৰি ট'কিঅ' অলিম্পিক, 2020 লৈ যোগ্যতা অৰ্জন কৰিছিল বজৰংগ পুনিয়াই ৷ ইয়াৰ পাছতে বিশ্ব ৰেংকিঙৰ শীৰ্ষ স্থানৰ মল্লযুঁজাৰুগৰাকীয়ে 65 কে. জি.ৰ ছেমি ফাইনেলত প্ৰৱেশ কৰে ৷ কিন্তু আম্পায়াৰৰ ভুল সিদ্ধান্তৰ বাবে নিয়াজবেকভৰ বিৰুদ্ধে 9-9ত ড্ৰ' খেলাৰ পাছতো পৰাস্ত হ'ব লগা হয় পুনিয়া ৷
আম্পায়াৰৰ এই সিদ্ধান্তক সমালোচনা কৰে অলিম্পিক, 2012ৰ ব্ৰঞ্জ পদকধাৰী মল্লযুঁজাৰু যোগেশ্বৰ দত্তই ৷ টুইটাৰৰ জৰিয়তে তেওঁ প্ৰতিক্ৰিয়া ব্যক্ত কৰে,"বজৰংগ পুনিয়া আৰু দৌলেত নিয়াজবেকভৰ মাজৰ মেচখন উপভোগ কৰাৰ পাছত যিকোনো লোকে ভুল আৰু শুদ্ধৰ মাজত পাৰ্থক্য বিচাৰি উলিয়াব পাৰিব ৷ তেনেহ'লে আম্পায়াৰে কিয় দেখা নাপালে ? এনে এক বৃহৎ প্ৰতিযোগিতাত এই ধৰণৰ অসাৱধানতা...সকলোৱে প্ৰত্যক্ষ কৰিছিল যে কাজাখস্তানৰ খেলুৱৈগৰাকীয়ে ভুল প্ৰণালীৰে খেলি আছিল ৷"
