গুৱাহাটী, 28 নৱেম্বৰঃ আই এছ এল, আই পি এলৰ পিছত পুনৰ অসমৰ ক্ৰীড়াপ্ৰেমীলৈ সুখবৰ ৷ গুৱাহাটীত দেশৰ সৰ্ববৃহৎ যুৱ ক্ৰীড়া সমাৰোহ ৷ 10 জানুৱাৰীৰ পৰা গুৱাহাটীত অনুষ্ঠিত হ’ব ‘খেল’ ইণ্ডিয়াৰ 2020'ৰ তৃতীয় সংস্কৰণ ৷ সমাৰোহৰ উদ্বোধনী কৰিব দেশৰ প্ৰধানমন্ত্ৰী নৰেন্দ্ৰ মোডীয়ে ৷ দেশৰ মুঠ ২৮ খন ৰাজ্য আৰু ৮ খন কেন্দ্ৰীয় শাসিত অঞ্চলৰ প্ৰায় ৯৫০০ গৰাকী খেলুৱৈ তথা কাৰ্যকৰ্তাই অংশগ্ৰহণ কৰিব এই খেল’ ইণ্ডিয়া ২০২০ প্ৰতিযোগিতাত । ২০ টা বিভিন্ন খেল অন্তৰ্ভুক্ত কৰা হৈছে এই সমাৰোহত । গুৱাহাটীৰ সৰুসজাই, নেহৰু ষ্টেডিয়াম, মহম্মদ তৈবুল্লা হকী ষ্টেডিয়াম, ছাই, চচল টেনিছ কমপ্লেক্সত অনুষ্ঠিত হ'ব খেল সমূহ । ইতিমধ্যেই প্ৰায় প্ৰস্তুতি সম্পূৰ্ণ কৰিছে অসম চৰকাৰৰ ক্ৰীড়া বিভাগে ।
অসমক ক্ৰীড়াক্ষেত্ৰৰ ‘হাব’ হিচাপে গঢ়ি তোলাৰ লক্ষ্যত মুখ্যমন্ত্ৰী সৰ্বানন্দ সোণোৱালৰ বাবে ৰাষ্ট্ৰীয় পৰ্যায়ৰ খেল অনুষ্ঠিত কৰাটো নিশ্চিত বাবে এইটো দিশত এক বৃহৎ খোজ । ১৩ দিনীয়াকৈ অনুষ্ঠিত হ'বলগীয়া এই সমাৰোহক লৈ অসমৰ বিভিন্ন স্থানত আৰম্ভ হৈছে কেম্প । এই কেম্পৰ পৰাই খেল’ ইণ্ডিয়াৰ বাবে নিৰ্বাচিত কৰা হ'ব খেলুৱৈ সকল । ১৫-২০ তকৈ অধিক সোণৰ পদক লাভেৰে অসমে শীৰ্ষ স্থানত উপনীত হোৱাৰ আশা কৰিছে অসম অলিম্পিক সন্থাই । ইফালে এই সমাৰোহত অসমৰ পৰম্পৰাগত খেল-ধেমালি, সংস্কৃতি প্ৰদৰ্শন কৰিব ৰাজ্য চৰকাৰে ।
উল্লেখযোগ্য যে অহা ৩০ নৱেম্বৰত সৰুসজাইত এই সমাৰোহৰ প্ৰথমটো কাৰ্যসূচী অনুষ্ঠিত হ'ব । য’ত উপস্থিত থাকিব মুখ্যমন্ত্ৰী সৰ্বানন্দ সোণোৱাল আৰু কেন্দ্ৰীয় মন্ত্ৰী কিৰেণ ৰিজিজু । এই অনুষ্ঠানতে মুকলি কৰা হ'ব খেল’ ইণ্ডিয়াৰ প্ৰতীক, শুভংকৰ, জাৰ্চি । মুঠৰ ওপৰত পুনৰ খেলৰ ৰাজধানী হিচাপে পৰিগণিত হ'ব গুৱাহাটী মহানগৰী।
