নিউজ ডেস্ক, ১৩ মে': দেওবাৰে অনুষ্ঠিত আইপিএলৰ ১২সংখ্যক সংস্কৰণৰ ফাইনেলত ডিফেণ্ডিং চেম্পিয়ন চেন্নাই চুপাৰ কিংছক পৰাস্ত কৰি খিতাপ দখল কৰে মু্ম্বাই ইণ্ডিয়ানছ দলে । এই জয়েৰে দলটোৱে চতুৰ্থবাৰলৈ খিতাপ দখল কৰাৰ লগতে আইপিএলৰ ইতিহাসত সৰ্বাধিক বাৰৰ বাবে এই সন্মান লাভ কৰা প্ৰথম দল হিচাপে পৰিগণিত হয় ।
হায়দৰাবাদৰ ৰাজীৱ গান্ধী আন্তঃৰাষ্ট্ৰীয় ষ্টেডিয়ামত অনুষ্ঠিত হোৱা মেচখনত মুম্বাই দলে গঢ়া ১৫০ ৰানৰ লক্ষ্য অনুসৰণ কৰি চেন্নাইয়ে দুই অ'পেনাৰ ফাফ্ ডো প্লেছি আৰু শ্বেইন ৱাটছনৰ জৰিয়তে সুন্দৰ আৰম্ভণি কৰে । চেন্নাইৰ হৈ ৱাটছনে সৰ্বাধিক ৫৯ বলত ৮০ ৰানৰ এক ইনিংছ খেলে । কিন্তু এই ৰান অনুসৰণ কৰি চেন্নাইয়ে ৭ টা উইকেট হেৰুৱাই ১৪৮ ৰানহে কৰিবলৈ সক্ষম হয় । আনহাতে, মুম্বাই দলৰ হৈ পোলাৰ্ডে সৰ্বাধিক ৪১ ৰান সংগ্ৰহ কৰে । ৪ অ'ভাৰত ১২ ৰান খৰচ কৰি ২ টা উইকেট দখল কৰা জছপ্ৰীত বুমৰাহে মেন অফ দা মেচৰ সন্মান লাভ কৰে ।
টুৰ্ণামেন্টত সৰ্বাধিক ৫২ টা ছিক্সেৰে আন্দ্ৰে ৰাছেলে মেন অফ দা ছিৰিজৰ সন্মান লাভ কৰে । ডেভিদ ৱাৰ্ণাৰে সৰ্বাধিক ৬৯২ ৰান সংগ্ৰহ কৰি "অ'ৰেঞ্জ কেপ" লাভ কৰাৰ লগতে ২৬ টা উইকেট দখল কৰা ইমৰাণ তাহিৰে "পাৰপল কেপ"ৰ অধিকাৰী হয় ।
