স্পৰ্টছ ডেস্ক, 19 এপ্ৰিল : "সকলো অধিনায়কৰে দলত এজন 'ফেভাৰেট প্লেয়াৰ' থাকে আৰু এম. এছ. ধোনীৰ ক্ষেত্ৰত সেয়া সুৰেশ ৰাইনা আছিল, প্ৰাক্তন ভাৰতীয় অধিনায়ক গৰাকীয়ে ৰাইনাক ধাৰাবাহিকভাৱে সমৰ্থন আগবঢ়াই আহিছিল" - এই মন্তব্য যুৱৰাজ সিঙৰ ৷
সীমিত অ'ভাৰৰ ক্ৰিকেটৰ ভাৰতৰ সৰ্বশ্ৰেষ্ঠ ক্ৰিকেটাৰসকলৰ অন্যতম যুৱৰাজ সিঙে স্মৰণ কৰে কেনেদৰে ধোনীয়ে বিশ্বকাপ, 2011ৰ এঘাৰজনীয়া দল নিৰ্বাচনৰ সময়ত ইউছুফ পাঠান আৰু সুৰেশ ৰাইনাৰ মাজত বিবুধিত পৰিছিল ৷
যুৱৰাজে কয়, "সুৰেশ ৰাইনাই অধিক সমৰ্থন লাভ কৰিছিল যিহেতু ধোনী তেওঁৰ সৈতে থিয় দিছিল ৷ প্ৰতিজন অধিনায়কৰে এজন ফেভাৰেট খেলুৱৈ থাকে আৰু মই ভাবো মাহিয়ে (ধোনী)ৰাইনাক সমৰ্থন কৰিছিল ৷"
অৱশেষত ইউছুফ পাঠান আৰু সুৰেশ ৰাইনাই দলত স্থান লাভ কৰিছিল যদিও টুৰ্ণামেন্টৰ মাজভাগতে ইউছুফক দলৰ পৰা বাহিৰত ৰখা হৈছিল ৷
তেওঁ লগতে কয়, "ইউছুফ পাঠানে সেই সময়ত ভাল খেলি আছিল আৰু মইও খেলিছিলো আৰু উইকেট সংগ্ৰহ কৰিবলৈ সক্ষম হৈছিলো ৷ আৰু ৰাইনাই ভাল প্ৰদৰ্শন কৰা নাছিল ৷"
"সেই সময়ত ভাৰতীয় দলত কোনো বাওঁহতীয়া স্পীনাৰ নাছিল আৰু তেওঁলোকৰ অন্য কোনো উপায় নথকাত মইয়ে উইকেট সংগ্ৰহ কৰিছিলো"- যুৱৰাজ ৷
ধোনীয়ে ভাৰতীয় দলৰ অধিনায়কৰ দায়িত্ব গ্ৰহণ কৰাৰ পৰা ৰাইনা দলটোৰ নিয়মীয়া খেলুৱৈ আছিল কিন্তু বিৰাট কোহলীয়ে এই দায়িত্বভাৰ গ্ৰহণ কৰাৰ পৰা আন্তৰাষ্ট্ৰীয় ক্ৰিকেটত ৰাইনাই দলত স্থান লাভত ব্যৰ্থ হয় ৷
2018 চনৰ জুলাই মাহত অন্তিমবাৰৰ বাবে ৰাইনাই ইংলেণ্ডৰ বিৰুদ্ধে এদিনীয়া মেচত অংশগ্ৰহণ কৰিছিল ৷ 2014/15 চনত ধোনীয়ে টেষ্ট মেচৰ পৰা অৱসৰ ঘোষণা কৰাৰ সময়তে অন্তিমবাৰৰ বাবে ৰাইনাই ভাৰতীয় টেষ্ট দলত স্থান লাভ কৰিছিল ৷
