গুৱাহাটী, 17 জানুৱাৰীঃ অসম আৰু ছত্তিশগড়ৰ মাজত গুৱাহাটীত চলি থকা পঞ্চম ৰাউণ্ডৰ এলিট গ্ৰুপ চিৰ ৰঞ্জী ক্ৰিকেট মেচখন অমিমাংসীত ৰূপে সমাপ্ত হয় ৷ গুৱাহাটীৰ বৰ্ষাপাৰা ষ্টেডিয়ামত অনুষ্ঠিত খেলখনত চতুৰ্থ দিন তথা অন্তিমটো দিনত আলহী দল ছত্তিশগড়ে এক উইকেটৰ বিনিময়ত 25 ৰানৰ পৰা বেট ধৰা আৰম্ভ কৰি দিনান্তত 252 ৰান সংগ্ৰহ কৰাত খেলখনৰ সমাপ্তি ঘটে ৷ আলহী দলৰ অধিনায়ক হৰপ্ৰিত সিঙ ভাটিয়াই দ্বিতীয় ইনিংছত 102 ৰানৰ অবিজিত ইনিংছ খেলে ৷ আনহাতে সুমন ৰুইকৰে 75 ৰানৰ ইনিংছ খেলে ৷
আনহাতে অসমৰ হৈ ৰিয়ান পৰাগে তিনিটা উইকেট, অৰুপ দাস আৰু মুক্তাৰ হুছেইনে এটাকৈ উইকেট দখল কৰিবলৈ সক্ষম হয় ৷ এই মেচখনৰ পৰা অসমে তিনি পইন্ট লাভ কৰিবলৈ সক্ষম হোৱাৰ বিপৰীতে ছত্তিশগড়ে এক পইন্ট লাভ কৰে ৷ অসমে নিজৰ পৰৱৰ্তী মেচ অহা 19 জানুৱাৰীত মহাৰাষ্ট্ৰৰ বিৰুদ্ধে গুৱাহাটীত অৱতীৰ্ণ হ’ব ৷
