স্পৰ্টছ ডেস্ক, 15 অক্টোবৰ : জেছন অন্ঠনী হো-শুক পৰাস্ত কৰি ডেনমাৰ্ক অপেনৰ কোৱাৰ্টাৰ ফাইনেলত প্ৰৱেশ কৰিছে ভাৰতীয় তাৰকা শ্বাটলাৰ কিদাম্বি শ্ৰীকান্তে ৷ 33 মিনিটৰ যুঁজত ভাৰতীয় খেলুৱৈগৰাকীয়ে কানাডিয়ান প্ৰতিপক্ষক পৰাস্ত কৰিবলৈ সক্ষম হয় ৷ পুৰুষৰ ছিংগলছৰ দ্বিতীয় ৰাউণ্ডত 21-15 21-14 ব্যৱধানত জেছনক পৰাস্ত কৰে শ্ৰীকান্তে ৷
উল্লেখ্য যে, ক'ভিড-19 ৰ বাবে BWF য়ে বহু কেইখন টুৰ্ণামেন্ট বাতিল কৰাৰ লগতে এছিয়া লীগ আৰু ৱৰ্ল্ড ট্যুৰ ফাইনেল জানুৱাৰী পৰ্যন্ত স্থগিত ৰাখিছিল ৷
প্ৰাক্তন শীৰ্ষ স্থানৰ শ্বাটলাৰগৰাকীৰ বৰ্তমান বিশ্ব ৰেংকিং চতুৰ্দশ ৷ দ্বিতীয় ৰাউণ্ডৰ অন্য এখন মেচৰ জয়ীৰ বিৰুদ্ধে এইবাৰ প্ৰতিযোগিতাত নামিব কিদাম্বি শ্ৰীকান্ত ৷ উল্লেখ্যযোগ্য যে, প্ৰতিযোগিতাৰ দ্বিতীয় ৰাউণ্ডৰ আনখন মেচ অনুষ্ঠিত হ'ব চাইনীজ টাইপেইৰ টিয়েন চেন চৌ আৰু আয়াৰলেণ্ডৰ এহাট এগুয়েনৰ মাজত ৷
আজিৰ দিনটোতে অন্য এখন মেচত হানছ ক্ৰিষ্টিয়ান ছলবাৰ্গ ভিট্টিনঘাছৰ বিৰুদ্ধে অৱতীৰ্ণ হ'ব আন এজন ভাৰতীয় শ্বাটলাৰ লক্ষ্য শেন ৷
লগতে পঢ়ক : বিশেষ চিকিৎসা বিমানেৰে জুভেন্টাছলৈ উভতিল ৰ'নাল্ডো
