নলবাৰী, 11 জুনঃ মুকালমুৱা আৰক্ষীয়ে সোমবাৰে নিশা আটক কৰে দুই দুৰ্ধৰ্ষ ডকাইত । মুকালমুৱা আৰক্ষী থানাৰ ভাৰপ্ৰাপ্ত আৰক্ষী বিষয়া জয়ন্ত কুমাৰ বৰ্মনৰ নেতৃত্বত চলা এক গোপন অভিযানত আটক মকবুল হুছেইন(২৫) আৰু চামনুৰ ইমান(২৪) নামৰ ডকাইত দুটা৷ লগতে ডকাইত দুটাৰ পৰা আৰক্ষীয়ে জব্দ কৰে ডকাইতি কাণ্ডত ব্যৱহৃত AS 01 DN 5882 নম্বৰৰ এলট' বাহনখন ৷
উল্লেখ্য যে এসপ্তাহ পূৰ্বে মুকালমুৱাৰ সাপকাটাত হোৱা এটা ডকাইতি কাণ্ডত জড়িত আছিল ধৃত ডকাইতদুটা ৷ বৰপেটা জিলাৰ বাঘবৰৰ ফৰজ আলী নামৰ লোকজনক ঈদৰ দিনা গুৱাহাটীৰ পৰা ঘৰলৈ গৈ থকা অৱস্থাতে ডকাইতৰ দলটোৱে বাট আগুচি ধৰি চলাইছিল ডকাইতি কাণ্ড । ফৰজ আলীয়ে মুকালমুৱা থানাত দাখিল কৰা এজাহাৰত উল্লেখ থকা অনুসৰি ডকাইতৰ দলে এক লাখ সত্তৰ হেজাৰ টকা আৰু চাৰিটা মোবাইল ফোন কাঢ়ি নিয়াৰ লগতে শাৰিৰীক ভাৱেও প্ৰহাৰ কৰিছিল ।
লগতে পঢ়কঃ কলিয়াবৰ আৰক্ষীৰ অভিযানত আটক 4 দুধৰ্ষ চোৰাং চিকাৰী
