ইণ্টাৰনেচনেল ডেস্ক, ১৯ জুলাই : অষ্ট্ৰেলিয়াৰ সমুদ্ৰ তীৰত উদ্ধাৰ হোৱা এক বিশেষ আকৃতিৰ বস্তুৱে ৰহস্যৰ সৃষ্টি কৰে । এখন সৰু গাড়ীৰ আকাৰৰ এই বস্তুটো সমুদ্ৰৰ তীৰত উদ্ধাৰ হয় । পিছত কৰ্তৃপক্ষই এই অস্বাভাৱিক বস্তুটো সন্দৰ্ভত তথ্য লাভ কৰে । ইয়াৰ পিছত মঙলবাৰে চলোৱা অনুসন্ধানত অষ্ট্ৰেলিয়াৰ দূৰৱৰ্তী সমুদ্ৰ তীৰত পানীয়ে ধুই যোৱা এখন সৰু গাড়ীৰ আকাৰৰ এটা চুঙাকৃতিৰ বস্তুটো বিদেশী ৰকেটৰ মহাকাশৰ আৱৰ্জনা বুলি সন্দেহ কৰিছে । উল্লেখ্য, দেওবাৰে অষ্ট্ৰেলিয়াৰ পাৰ্থ চহৰৰ পৰা প্ৰায় ২৫০ কিলোমিটাৰ উত্তৰে গ্ৰীণ হেডত আৱিষ্কাৰ হৈছিল এই আচৰিত বস্তুটো । পিছত আৰক্ষীয়ে এই আশ্চৰ্যকৰ বস্তুটো থকা অঞ্চলটো ঘেৰাও কৰি ইয়াৰ অনুসন্ধান আৰম্ভ কৰিছিল ।
অষ্ট্ৰেলিয়ান মহাকাশ সংস্থাই জনোৱা মতে, তেওঁলোকে বস্তুটো চিনাক্ত কৰিবলৈ আন মহাকাশ সংস্থাৰ সৈতে যোগাযোগ কৰি আছে । এই বস্তুটো আংশিকভাৱে কোনো বোৱা সামগ্ৰীৰে নিৰ্মিত যেন লাগিছে । সংস্থাটোৱে টুইট কৰি কয়, "বস্তুটো বিদেশী মহাকাশ উৎক্ষেপণ বাহনৰ হ'ব পাৰে আৰু আমি বিশ্বজুৰি থকা মহাকাশ গৱেষণা সংস্থাবোৰৰ সৈতে যোগাযোগ কৰি আছোঁ । আশাকৰোঁ তেওঁলোকে অধিক তথ্য প্ৰদান কৰিবলৈ সক্ষম হ'ব পাৰে ।"
আনহাতে, ইউৰোপীয় মহাকাশ সংস্থাৰ অভিযন্তা এণ্ড্ৰিয়া বইডে কয় যে তেওঁৰ সহকৰ্মীসকলৰ বিশ্বাস যে ভাৰত মহাসাগৰৰ পৰা বৈ অহা বস্তুটো এটা উপগ্ৰহ উৎক্ষেপণ কৰাৰ সময়ত ভাৰতীয় ৰকেটৰ পৰা পৰিছিল । তেওঁ অষ্ট্ৰেলিয়ান ব্ৰডকাষ্টিং কৰ্প'ৰেচনক কয়, "আকৃতি আৰু আকাৰৰ ওপৰত ভিত্তি কৰি আমি নিশ্চিত যে এইটো হৈছে ভাৰতীয় ৰকেটৰ এটা ওপৰৰ পৰ্যায়ৰ ইঞ্জিন যাক বিভিন্ন অভিযানৰ বাবে বহুবাৰ ব্যৱহাৰ কৰা হয় ।"
