ইন্টাৰনেশ্বনেল ডেক্স,27 মাৰ্চঃ বিশ্বৰ সৰ্বত্ৰে এতিয়া ত্ৰাসৰ সৃষ্টি কৰিছে মাৰাত্মক কৰ‘ণা ভাইৰাছে৷ বৰ্তমান সময়লৈকে বিশ্বৰ প্ৰায় দুশখন দেশত বিয়পি পৰিছে এই ভাইৰাছ৷ চীনৰ পৰা আৰম্ভ হোৱা এই ভাইৰাছে প্ৰথমাৱস্থাত যদিও চীন দেশত সৰ্বাধিক হাৰত সংক্ৰমিত হোৱাৰ লগতে দ্ৰুত গতিত প্ৰাণ লৈছিল তিনি হাজাৰতকৈও অধিক লোকৰ ৷
কিন্তু ক্ৰমান্বয়ে চীনে এই ভাইৰাছৰ সংক্ৰমণৰ গতি ৰোধ কৰিবলৈ সক্ষম হয় ৷ ইয়াৰ পৰৱৰ্তী সময়ত এই ভাইৰাছে ইটালী আৰু আমেৰিকাত ভয়ংকৰ ৰূপ ধাৰণ কৰে৷ ক্ৰমাৎ এই ভাইৰাছৰ ফলত হোৱা মৃত্যুৰ ক্ষেত্ৰত চীনক অতিক্ৰম কৰে ইটালীয়ে ৷
আনহাতে, কৰ’ণাত আক্ৰান্ত হোৱা ৰোগীৰ সংখ্যাৰ ক্ষেত্ৰত তৃতীয় স্থানত থকা আমেৰিকাই যোৱা 24 ঘণ্টাত সংক্ৰমণৰ ক্ষেত্ৰত প্ৰথম স্থানত উপনীত হয় ৷ শেহতীয়াভাৱে চীন আৰু ইটালীক অতিক্ৰম কৰি মুঠ 85,594 জন লোকৰ শৰীৰত এই মাৰাত্মক ভাইৰাছৰ অৱস্থিতি ধৰা পৰিছে আমেৰিকাত ৷
ইয়াৰ উপৰিও আমেৰিকাত এই ভাইৰাছত আক্ৰান্ত হৈ মৃত্যু হোৱা লোকৰ সংখ্যা 1300 জনলৈ বৃদ্ধি ৷ জন হপকিনচ বিশ্ববিদ্যালয়ৰ প্ৰকৃত-সময় ট্ৰেকাৰৰ ফালৰ পৰা বৃহস্পতিবাৰে এই কথা সদৰি কৰা হয় ৷
তদুপৰি মন কৰিবলগীয়া কথা এই যে, কৰ‘ণা ভাইৰাছত আক্ৰান্ত দেশসমূহৰ ভিতৰত আমেৰিকাই সৰ্বাধিক হাৰত কৰ‘ণাত আক্ৰান্তৰ সন্দেহ কৰা মানুহৰ শৰীৰত পৰীক্ষা কৰিছে ৷ আন্তঃৰাষ্ট্ৰীয় স্ংবাদমাধ্যমৰ পৰা পোৱা খৱৰ অনুসৰি আমেৰিকাৰ প্ৰায় 160 মিলিয়ন লোকক নিজৰ নিজৰ ঘৰত সোমাই থাকিবলৈ নিৰ্দেশ দিয়া হৈছে ৷
লগতে পঢ়ক-কৰ’না ভাইৰাছঃ ইউৰোপিয়ান ইউনিয়নৰ ৰাষ্ট্ৰদূতৰ সৈতে আছুতীয়া সাক্ষাৎকাৰ
