চিটাৰা ডেস্ক, 30 জুলাই : টিভি জগতৰ বাবে আন এক দুঃখবৰ । গুজৰাটী, হিন্দী ছবিকে ধৰি বহু টিভি ধাৰাবাহিকত অভিনয় কৰা প্ৰবীণ অভিনেতা ৰসিক ডেভে যোৱা শুকুৰবাৰে বৃক্কৰ বিকল হোৱাৰ ফলত মৃত্যুক সাৱটি লয় । যোৱা ১৫ দিন ধৰি চিকিৎসালয়ত চিকিৎসাধীন হৈ আছিল অভিনেতাগৰাকী । মৃত্যুৰ সময়ত ৰসিকে এৰি থৈ গৈছে পত্নী আৰু দুটিকৈ সন্তান । মৃত্যুৰ সময়ত তেওঁৰ বয়স আছিল ৬৫ বছৰ (Rasik Dave passed away) ।
‘Kyunki Saas Bhi Kabhi Bahu Thi’ ধাৰাবাহিকখনত অভিনয় কৰি বিখ্যাত হোৱা অভিনেত্ৰী কেতকী দাৱৰ সৈতে তেওঁ বিবাহপাশত আবদ্ধ হয় । তাৎপৰ্যপূৰ্ণভাৱে জুলাই মাহত টিভি জগতৰ পৰা এয়া দ্বিতীয়টো দুঃসংবাদ । ইয়াৰ পূৰ্বে হিট টিভি শ্ব’ ‘Bhabi Ji Ghar Par Hai!’ত মালখানৰ চৰিত্ৰত অভিনয় কৰা অভিনেতা দীপেশ ভানৰ ক্ৰিকেট খেলি থাকোঁতে মৃত্যু হৈছিল ।
সংবাদ মাধ্যমৰ খবৰ অনুসৰি যোৱা বছৰৰ পৰা ৰসিক ডেভ অসুস্থ হৈ আছিল । দুবছৰ ধৰি ডায়েলাইচিছ কৰি আছিল আৰু দিনক দিনে তেওঁৰ কিডনী বেয়া হৈ আহিছিল । এনে অৱস্থাত ১৫ দিন পূৰ্বে যেতিয়া তেওঁৰ স্বাস্থ্যৰ অৱনতি ঘটে তেতিয়া পৰিয়ালৰ লোকে লগে লগে অভিনেতাজনক চিকিৎসালয়ত ভৰ্তি কৰে । কিন্তু দুৰ্ভাগ্যবশতঃ ২৯ জুলাইৰ নিশা তেওঁ শেষ নিশ্বাস ত্যাগ কৰে ৷
ৰসিকৰ মৃত্যুৰ বাতৰিয়ে টিভি জগতত শোকৰ ঢৌ তুলিছে । বহু গুজৰাটী ছবিত কাম কৰাৰ পিছত ‘মাছুম’ ছবিখনেৰে তেওঁ বলীউডত প্ৰৱেশ কৰিছিল। মাজতে তেওঁ অভিনয় জগতৰ পৰা আঁতৰি আহিছিল আৰু তাৰ পিছত টিভিৰ ধাৰাবাহিক সংস্কাৰৰ জৰিয়তে শক্তিশালী প্ৰত্যাৱৰ্তন ঘটাইছিল । ৰসিকে ‘চিআইডি’, ‘কৃষ্ণ’কে ধৰি বহু টিভি শ্ব’ত অভিনয় কৰিছে ।
লগতে পঢ়ক : Rajinikanth honoured by IT Department: আয়কৰ বিভাগৰ দ্বাৰা সন্মানিত চুপাৰষ্টাৰ ৰজনীকান্ত; গৌৰৱান্বিত কন্যা ঐশ্বৰ্য
