চিটাৰা ডেস্ক, 12 অক্টোবৰ: ১৯ অক্টোবৰত মুক্তি লাভ কৰিব দক্ষিণৰ ছুপাৰষ্টাৰ থালাপথী বিজয়ৰ ছবি লিঅ’। ছবিখনৰ এডভান্স বুকিং ইতিমধ্যেই আৰম্ভ হৈছে আৰু এডভান্স বুকিঙত লিঅ’ ছবিখনে বহুত ভাল ফলাফল দেখুৱাইছে । দীৰ্ঘদিন ধৰি অনুৰাগীয়ে অপেক্ষা কৰি আছিল থালাপথী বিজয়ৰ আটাইতকৈ প্ৰত্যাশিত এই ছবিখনৰ বাবে । এনে পৰিস্থিতিত ছবিখনৰ আগতীয়া বুকিং আৰম্ভ হোৱাৰ লগে লগে দৰ্শকে অতি উত্তেজনাৰে লিঅ’ৰ টিকট ক্ৰয় কৰা দেখা গৈছে ।
এতিয়ালৈকে বিজয়ৰ ছবিখনৰ ৩৭৩৪৬ খন টিকট বিক্ৰী হৈছে আৰু এইদৰে লিঅ’ই এই পৰ্যন্ত ৬.৯২ কোটি টকা উপাৰ্জন কৰিছে । এই সংকলন ছবিখন মুক্তিৰ সাত দিন আগৰ আৰু এই সংকলনে ভংগ কৰিছে শ্বাহৰুখ খানৰ এই বছৰৰ দুখন ব্লকবাষ্টাৰ ছবি ‘পাঠান’ আৰু ‘জৱান’ৰ অভিলেখ । চলিত বৰ্ষৰ (২০২৩) সৰ্বাধিক এডভান্স বুকিং পোৱা ভাৰতীয় ছবি হিচাপে পৰিগণিত হৈছে লিঅ’।
'জৱান' আৰু 'পাঠান'ক অভাৰটেক কৰিলে লিঅ’ই !
সংবাদ মাধ্যমৰ বাতৰি অনুসৰি, পূৰ্বে লিঅ’ প্ৰায় ১০০০ খন পৰ্দাত চলিব বুুলি কোৱা হৈছিল, কিন্তু এতিয়া ছবিখনৰ পৰ্দা ১৩৩৮ খনলৈ বৃদ্ধি কৰা হৈছে । দৰাচলতে আমেৰিকাৰ অন্যতম বৃহৎ চিনেমা ছিৰিজ এএমচিয়েও ‘লিঅ’ৰ এডভান্স বুকিং আৰম্ভ কৰিছে । কোৱা হৈছে যে লিঅ’ ছবিখন মুক্তিৰ পূৰ্বে আগতীয়াকৈ বুকিঙৰ জৰিয়তেই ১২ লাখ ডলাৰতকৈ অধিক উপাৰ্জন কৰিব ।
এই ছবিখনত বিজয়ক দেখা যাব একচন ভৰ্তি অৱতাৰত
আমেৰিকাত ছবিখন 2D ৰ পৰা XD লৈকে IMAX আৰু RPX লৈকে ফৰ্মেটত প্ৰদৰ্শন কৰা হ’ব । ছবিখনৰ বেছিভাগ প্ৰদৰ্শন তামিল আৰু তেলুগু ভাষাত কৰা হৈছে । ভাৰতৰ চেন্সৰ ব’ৰ্ডৰ পৰা ১৩টা কাট লাভ কৰিছে ছবিখনে আৰু ইয়াৰ অধীনত নিৰ্মাতাসকলে ছবিখন প্ৰদৰ্শন কৰিব । বিজয়ৰ উপৰিও একচন ভৰ্তি ছবিখনত সঞ্জয় দত্তকো গুৰুত্বপূৰ্ণ চৰিত্ৰত দেখা যাব । ইয়াৰ উপৰিও তৃষা, গৌতম বাসুদেৱ মেনন আৰু অনুৰাগ কাশ্যপকো দেখা যাব । মনকৰিবলগীয়া বিষয় যে বিজয়ৰ ডাবল ৰ’ল দেখা যাব ছবিখনত ।
