চিটাৰা ডেস্ক, 6 ছেপ্টেম্বৰ : সপোন কেৱল দেখিলেই নহয়, তাক পূৰ কৰিবলৈ কষ্টও কৰিব লাগে- এই কথাষাৰকে যেন প্ৰমাণ কৰিলে কৰিমগঞ্জৰ অমিত কুমাৰ নাথে । মনত আশাৰ সমানে জোৰো আছিল অমিত কুমাৰ নাথৰ, সেই বাবেই আজি সম্পূৰ্ণ নিজাববীয়াকৈ নিৰ্মাণ কৰি উলিয়াবলৈ সাহস কৰিছে অসমৰ পৰা প্ৰথমখন বাংলা চিনেমা ৷
আনৰ ঘৰত টিভি চাই চাই ঘৰলৈ আহি নৃত্যৰ আখৰা চলাইছিল অমিতে ৷ তেনেকৈয়ে আয়ত্ব কৰিছিল নৃত্যৰ অ আ ক খ ৷ পৰিয়ালৰ দুৰৱস্থাক নেওচি হাতত এটকাও নোলোৱাকৈ হেলাৰঙে ওলাই গৈছিল কোনোবা এখন নাচৰ স্কুললৈ নাচ শিকিবলৈ ৷ শিকাৰ আগ্ৰহ দেখি গুৰুৱেও কৰিব পৰা নাছিল মানা ৷
তেওঁলোকৰ পৰা পোৱা অযুত সহাঁৰিকে বুকুত বান্ধি পৰিয়ালে মানা কৰা সত্বেও ওলাই গৈছিল নিজ লক্ষৰে ৷ হাতত মাত্ৰ কেইটিমান টকা লৈ উপস্থিত হৈছিলগৈ মায়া নগৰী মুম্বাইত ৷ নাখাই নবৈ নোশোৱাকৈ মুম্বাইত দিন পাৰ কৰা অমিতে তাত জীৱনৰ প্ৰথমটো 50 টকা আৰ্জি ঘৰলৈ উভতিছিল সেই পইচা মাকৰ হাতত গতাবলৈ ৷
শ্বাহৰুখ, ছলমান, কেটৰিণা আদি বলীউডৰ নামী-দামী তাৰকাৰ সৈতে নৃত্যশিল্পী হিচাপে কাম কৰা অমিতে কৰিমগঞ্জ অঞ্চলটোত নিজে আহৰণ কৰা জ্ঞান বিলোৱাৰ লগতে আগ্ৰহী সকলক শিকোৱাৰ মানসিকতাও পুহি ৰাখিছে ৷
অসমৰ বাবে গৌৰৱৰ বিষয় যে অমিত কুমাৰ নাথে এখন চিনেমাৰ কাম হাতত লৈ ইতিমধ্যেই সম্পূৰ্ণ কৰি তুলিছে ৷ তেওঁ কৈছে অসমৰ বৰাক ভেলীৰ পৰা নিৰ্মাণ হোৱা এইখন হৈছে প্ৰথমখন বাংলা চিনেমা ৷ ইয়াৰ পূৰ্বে অসমৰ পৰা ডাঙৰ পৰ্দাত বাংলা ছবি নিৰ্মাণ হোৱা নাই ৷ ছবিখনৰ অভিনেত্ৰী গৰাকীয়েও কৈছে এইখনেই অসমৰ পৰা নিৰ্মাণ হোৱা প্ৰথমখন বাংলা চিনেমা ৷ ইয়াৰ পূৰ্বে অৱশ্যে বাংলা চৰ্ট ফিল্ম নিৰ্মাণ হৈছে ৷ এইবছৰতেই মুক্তি দিয়াৰ কথা ছবিখন ৷
বিভিন্ন হিন্দী, তামিল আদি ধাৰাবাহিকত কাম কৰাৰ লগতে বলীউড ছবিতো কাম কৰি অহাৰ বাবে আজি এইখিনি সাহস গোটাব পাৰিছে বুলি অনুভৱ কৰে অমিতে ৷ তেওঁ নিৰ্মাণ কৰি উলিওৱা ছবিখনৰ নাম ‘আৰাধ্যা’ ৷ দূৰ্গা পূজাৰ সময়ত ছবিখনৰ পোষ্টাৰ সমগ্ৰ ভাৰততে মুকলি কৰা হ’ব ৷ চলিত বছৰৰ ডিচেম্বৰত ছবিখনে মুক্তি পোৱাৰ কথা ৷ কলকাতা আৰু অসমৰ বিভিন্ন শিল্পীয়ে অভিনয় কৰিছে ছবিখনত ৷ মুখ্য চৰিত্ৰত আছে শুভদীপ চক্রৱর্তী আৰু অন্নপূৰ্ণা কুৰি ৷
অভিনেতা অভিনেত্ৰীৰ লগতে অমিত কুমাৰ নাথেও যথেষ্ট আশা কৰিছে ছবিখনকলৈ ৷
লগতে পঢ়ক : Shashi Tharoor Twitter: শশী থাৰুৰৰ ভাইৰেল গানক লৈ জাভেদ আখতাৰৰ ধেমেলীয়া টুইট
