নগাঁও, 26 আগষ্ট : অসমবাসীলৈ এটা সুখবৰ । শিল্পী ৰঞ্জন বেজবৰুৱালৈ 'ৰাষ্ট্ৰীয় সংস্কৃত গীতিকবি' সন্মান । কৰ'ণাসৃষ্ট জটিল পৰিস্থিতিৰ মাজতে অসমবাসীলৈ আহিছে এই সুখবৰ ৷ সংস্কৃত গীতৰ বিশিষ্ট শিল্পী,সংস্কৃত-গীতিকাৰ,অনুবাদক নগাঁৱৰ ৰঞ্জন বেজবৰুৱালৈ আগবঢ়োৱা হৈছে এই বছৰৰ 'ৰাষ্ট্ৰীয় সংস্কৃত গীতিকবি' সন্মান ।
উড়িষাৰ পুৰীস্থিত সংস্কৃত আৰু ভাৰতীয় সংস্কৃতিৰ প্ৰচাৰৰ দিশত উৎসৰ্গিত,বিশ্বৰ 42খন দেশলৈ প্ৰসাৰিত আন্তৰাষ্ট্ৰীয় অনুষ্ঠান 'লোকভাষা প্ৰচাৰ সমিতি'য়ে আগবঢ়াইছে এই সন্মান ৷ সমিতিৰ কেন্দ্ৰীয় কাৰ্যনিৰ্বাকৰ সিদ্ধান্ত মৰ্মে অধ্যক্ষ ড৹ সদানন্দ দীক্ষিতে এক বিজ্ঞপ্তিযোগে এই কথা সদৰি কৰিছে ।
অসমীয়া তথা ভাৰতীয় সংগীতক সংস্কৃত ভাষাৰ মাধ্যমেৰে আৰু সংস্কৃত ভাষাক ভাৰতীয় সংগীতৰ মাধ্যমেৰে সমাজত জনপ্ৰিয় কৰাৰ ক্ষেত্ৰত শিল্পী ৰঞ্জন বেজবৰুৱাই আগবঢ়াই আহিছে বিশেষ অৰিহণা । মূলতঃ অনুবাদ আৰু পুনঃসৃষ্টিৰ জৰিয়তে ভাৰতীয় ভাষা আৰু সংগীতৰ আদান-প্ৰদানেই বেজবৰুৱাৰ সাংস্কৃতিক কৰ্মৰ মূল বিষয় । তেওঁৰ শতাধিক মৌলিক আৰু ভিন্ন ভাষাৰ পৰা সংস্কৃতলৈ অনূদিত গীতৰ পুথি দুখন হৈছে 'গীত-সংস্কৃতম্' আৰু ভাৰতীয় সংস্কৃতিমূলক নিৱন্ধ সংকলন 'আনন্দ-সুধাকৰঃ' ।
লগতে পঢ়কঃ বিধায়ক প্ৰশান্ত ফুকনৰ সমষ্টিত 15 বছৰে চৰকাৰী আঁচনিৰ পৰা বঞ্চিত এজন লোক
