নগাঁও, 4 ছেপ্টেম্বৰ : প্ৰায় প্ৰতিদিনেই ৰাজ্যত ড্ৰাগছৰ বিৰুদ্ধে অভিযান চলাইছে আৰক্ষীয়ে ৷ শেহতীয়াকৈ কেইটামান মাহত অসম আৰক্ষীয়ে চলোৱা এই অভিযানত ড্ৰাগছ মাফিয়াৰ অন্ধকাৰ জগতখনৰ বহু পূৰ্বতে নজনা তথ্য পোহৰলৈ আহিছে ৷ ইফালে, অসম আৰক্ষীৰ ড্ৰাগছ বিৰোধী এই অভিযানত আটাইতকৈ চৰ্চিত আৰক্ষী বিষয়া গৰাকীয়েই হৈছে নগাঁৱৰ আৰক্ষী অধীক্ষক আনন্দ মিশ্ৰ ৷ প্ৰায় প্ৰতিদিনেই নগাঁও জিলাত আনন্দ মিশ্ৰই গঠন কৰি দিয়া আৰক্ষীৰ বিশেষ গোটে ড্ৰাগছৰ বিৰুদ্ধে অভিযান অব্যাহত ৰাখিছে ।
কিন্তু, ইমানৰ পিছতো ৰাজ্যত অব্যাহত আছে ড্ৰাগছ মাফিয়াৰ সক্ৰিয়তা ৷ এক কথাত বিষয়টো এতিয়া আৰক্ষী বনাম ড্ৰাগছ মাফিয়াৰ এখন চাঞ্চপেঞ্চ -থ্ৰীলাৰত পৰিগণিত হৈছে ৷ শেহতীয়াকৈ পোহৰলৈ অহা তথ্য অনুসৰি, জিলাখনত ড্ৰাগছ মাফিয়াৰ ৰূপত আত্মপ্ৰকাশ ঘটিছে একাংশ মহিলাৰ ৷ পিছে অপৰাধী যদি ডালে-ডালে, আৰক্ষী বাহিনীও পাটে পাটে; ফলত নগাঁও আৰক্ষীৰ অভিযানত শেহতীয়াকৈ গ্ৰেপ্তাৰ হৈছে এগৰাকীৰ পিছত আনগৰাকী মহিলা ।
