নিউজ ডেক্স, 24 ছেপ্টেম্বৰঃ ৰাজ্যৰ প্ৰান্তে-প্ৰান্তে এতিয়া দশভূজাক আদৰাৰ ব্যাপক প্ৰস্তুতি ৷ আধ্যাত্মিকতাৰ পৰা আৰম্ভ কৰি আধুনিক প্ৰযুক্তি লৈকে সকলো প্ৰকাৰে মা দূৰ্গাক আদৰাৰ প্ৰস্তুতি অব্যাহত ৰাখিছে মত্যবাসীয়ে ৷ ব্যস্ততা বাঢ়িছে মৃণ্ময় শিল্পীৰ ৷ ব্যস্ত হৈছে দূৰ্গা পূজাৰ আয়োজক সকলো ৷ কাৰণ এয়া যে শৰতৰ বতৰ, এয়া যে দুষ্টক দমন কৰি ধৰাত শান্তি প্ৰতিষ্ঠা কৰিবলৈ নামি অহা দেৱী দূৰ্গাক আদৰাৰ বতৰ ৷ সকলোৰে দৃষ্টিত শৰতৰ আছে সুকীয় গৰিমা ৷
দূৰ্গোৎসৱত নানা ধৰনে চমক দিৱলৈ, ৰাজ্যৰ চৌপাশে আকৰ্ষণীকৈ সজাই তোলা হৈছে মণ্ডপ সমূহ ৷ নগাঁৱৰ শনিমন্দিৰ পূজা সমিতিয়ে এইবাৰ মচুৰ ডালিৰে নিৰ্মাণ কৰি আছে দূর্গাৰ প্ৰতিমা আৰু পূজা মণ্ডপ। নামঘৰৰ আৰ্হিত নিৰ্মীয়মান এইখন শনিমন্দিৰ পূজা মণ্ডপতে দেখা পাব মচুৰ ডালিৰে নিৰ্মিত দুৰ্গা প্ৰতিমা । নগাঁৱৰ স্থানীয় শিল্পী অচ্যুত শইকীয়া আৰু তেওঁৰ পত্নী জ্যোতিৰাণী শইকীয়াই নিৰ্মাণ কৰা এই প্ৰতিমাত এই পৰ্য্যন্ত খৰছ হৈছে এক কুইণ্টলতকৈ অধিক মচুৰ ডালি।
সমান্তৰালকৈ, এতিয়া অন্তহীন ব্যস্ততা মৃণ্ময় শিল্পীসকলৰ ৷ মৃন্ময় শিল্পীৰ হাতৰ সুনিপুন পৰশত লাহে-লাহে পূৰ্ণাতা পাইছে দশভূজাৰ মৃণ্ময় প্ৰতিমাই ৷ এতিয়া মাথো প্ৰয়োজন অন্তিম পৰশৰ ৷ এতিয়া এনেদৰে অশান্ত কহুৱাই মানুহৰ মনবোৰ অশান্ত কৰি তোলাৰ শৰৎ ঋতুত দেৱী দূৰ্গাক আদৰিৱলৈ অন্তহীন ব্যস্ততা মত্তবাসীৰ ৷ দুৱৰি বনত নিয়ৰে চুমা দিয়া শৰতৰ বিনন্দীয়া বতৰতে ধৰালৈ দুষ্টক দমন কৰি শান্তি প্ৰতিষ্ঠা কৰিবলৈ নামি আহিব দূৰ্গতিনাশিনী দেৱী দূৰ্গা ৷
