গুৱাহাটী, ১১ জুলাই : কাইলৈ অৰ্থাৎ সোমবাৰৰ পৰা অনুষ্ঠিত হ'ব বিধানসভাৰ বাজেট অধিবেশন । ড৹ হিমন্তবিশ্ব শৰ্মা চৰকাৰৰ এইখনেই হ'ব প্ৰথমখন পূৰ্ণাংগ বাজেট অধিবেশন । এই অধিবেশনতে ১৬ জুলাইত বিত্ত মন্ত্ৰী অজন্তা নেওগে ২০২১-২২ বৰ্ষৰ বাজেট দাখিল কৰিব । কিন্তু বাজেট দাখিলৰ পূৰ্বে দেওবাৰে ৰাজ্য চৰকাৰে পঞ্চায়ত প্ৰতিনিধি সকলৰ বকেয়া পাৰিতোষিক ১৭০ কোটি টকা মোকলাই দিছে ।
পঞ্চায়ত প্ৰতিনিধি সকলৰ পাৰিতোষিক বকেয়া হৈ থকাৰ বিষয়টো বিভাগীয় মন্ত্ৰী ৰণজিৎ কুমাৰ দাসে মুখ্যমন্ত্ৰী ড৹ হিমন্তবিশ্ব শৰ্মাক অৱগত কৰে ৷ তাৰ পাচতে পিছতে এই ধনৰাশি মোকলাই দিবলৈ মুখ্যমন্ত্ৰীয়ে বিত্ত বিভাগক নিৰ্দেশ দিয়ে ৷ সেই মৰ্মে আজি বিত্ত বিভাগে মোকলাই দিয়ে ১৭০ কোটি টকা ।
ইয়াৰ ফলত ২৬ গৰাকী জিলা পৰিষদৰ সভাপতি, ২৬ গৰাকী জিলা পৰিষদৰ উপ-সভাপতি, ৪২০ গৰাকী জিলা পৰিষদৰ সদস্য, ১৮৫ গৰাকী আঞ্চলিক পঞ্চায়তৰ সভাপতি, ১৮৫ গৰাকী আঞ্চলিক পঞ্চায়তৰ উপ-সভাপতি, ২,১৯৭ গৰাকী আঞ্চলিক পঞ্চায়তৰ সদস্য, ২১,৯৭০ গৰাকী ৱাৰ্ড মেম্বাৰ আৰু ২,১৯৭ গৰাকী গাঁও পঞ্চায়তৰ সভাপতি উপকৃত হ’ব ।
লগতে পঢ়ক-"সেউজীয়া" ৰ মাজত কাইলৈৰ পৰা বিধানসভাৰ বাজেট অধিবেশন
