নিউজ ডেস্ক, 12 ডিচেম্বৰ: বুধবাৰে নিশা ৰাজ্যসভাত কেব গৃহীত হোৱাৰ পাছত অসমত ক্ৰমাৎ উত্তাল হৈ পৰিছে কেব বিৰোধী আন্দোলন যাৰ ফলত গুৱাহাটীকে ধৰি ৰাজ্যৰ বহু চহৰত জাৰি কৰা হৈছে সান্ধ্য আইন ৷ ৰাজ্যখনৰ পৰিস্থিতিৰ প্ৰতি লক্ষ্য ৰাখি বৃহস্পতিবাৰে কেইবাটাও বিমান কোম্পানীয়ে গুৱাহাটীকে ধৰি ডিব্ৰুগড় আৰু ইম্ফলত বাতিল কৰিছে কেইবাখনো বিমান ৷ গুৱাহাটী বিমান বন্দৰত স্পাইছ জেটে বাতিল কৰিছে 2 খনকৈ আন্তঃৰাজ্যিক বিমান, একেদৰে বাতিল হৈছে আন তিনিখন বিমান ৷ বাতিল হোৱা বিমান কেইখনৰ নম্বৰ হ'ল SG 3747/3748, SG 3319/3320, 6E 596, 186, 112 ৷ আনকি সাময়িক পৰিস্থিতিৰ প্ৰতি লক্ষ্য ৰাখি ভূটানেও বাতিল কৰিছে গুৱাহাটী হৈ ছিংগাপুৰ যাব লগা আন্তঃৰাষ্ট্ৰীয় বিমান ৷
ইফালে, ডিব্ৰুগড় বিমান বন্দৰতো ইণ্ডিগোৰ 6E9206 (A320) কলতাকা-ডিব্ৰুগড় বিমানখন বাতিল কৰা হৈছে ৷ আনহাতে ইম্ফল গুৱাহাটীৰ মাজতো বিমান বাতিল কৰা হৈছে ৷ বিমান কোম্পানী কেইটাই যাত্ৰীসকলক নিজৰ লগত অত্যাৱশ্যকীয় সামগ্ৰী সমূহ মজুদ ৰাখিবলৈ আহ্বান জনাইছে ৷ অৱশ্যে পৰিস্থিতি পুনৰ আগৰ অৱস্থালৈ ঘূৰি আহিলে পুনৰ বিমানসমূহৰ চলাচল আৰম্ভ কৰা হ'ব ৷
