ডিব্ৰুগড়, 26 এপ্ৰিল : ডিব্ৰুগড় কছাৰীঘাটত সোমবাৰে সংঘটিত হয় এটা শোকাৱহ ঘটনা ৷ ব্ৰহ্মপুত্ৰত গা ধুবলৈ গৈ এটি ১৩ বছৰীয়া কিশোৰৰ সলিল সমাধি ঘটে। নিহত কিশোৰগৰাকী অভিজিত মণ্ডল বুলি জানিবলৈ পোৱা গৈছে ।
ঘটনা অনুসৰি, ডিব্ৰুগড়ৰ শান্তি পাৰাৰ বেলপট্টিৰ ৰাজু সিং, সংস্কাৰ ঘোষ, সুমিত ভট্ট আৰু অভিজিৎ মণ্ডল নামৰ চাৰিগৰাকী কিশোৰে ব্ৰহ্মপুত্ৰত গা-ধুই আছিল। গা ধুই থকা অৱস্থাতে হঠাৎ লুইতৰ সোঁতে চাৰিজনকে উটুৱাই নিয়ে ৷ কিন্তু ৰাজু সিং আৰু সুমিত ভট্টই কথমপি সাঁতুৰি পাৰলৈ আহিবলৈ সক্ষম হয় যদিও সংস্কাৰ ঘোষ আৰু অভিজিৎ মণ্ডলক ব্ৰহ্মপুত্ৰৰ সোঁতে উটুৱাই নিয়ে ৷
উল্লেখ্য যে, উক্ত ঘটনাটো চাজিদ আনচাৰি নামৰ আন এজন যুৱকে প্ৰত্যক্ষ কৰাত দৌৰি আহি কোনোমতে জীৱন্তে উদ্ধাৰ কৰিবলৈ সক্ষম হয় সংস্কাৰ ঘোষক ৷ আনহাতে, অভিজিৎ মণ্ডল নামৰ কিশোৰজন ব্ৰহ্মপুত্ৰত সন্ধানহীন হৈ পৰে।
স্থানীয় ৰাইজে ততালিকে ঘটনা সন্দৰ্ভত SDRF বাহিনীক খবৰ দিয়ে ৷ ঘটনাস্থলীত SDRF বাহিনীৰ লোক উপস্থিত হৈ ততালিকে ব্ৰহ্মপুত্ৰত অভিযান চলাই অভিজিৎ মণ্ডল নামৰ কিশোৰজনক মৃত অৱস্থাত উদ্ধাৰ কৰিবলৈ সক্ষম হয় ।
লগতে পঢ়ক-ক’ভিড-১৯ সন্দৰ্ভত বিৰোধীৰ সদিচ্ছা নাই: সৰ্বানন্দ সোণোৱাল
