ডিব্ৰুগড়, 12 নৱেম্বৰ : ডেজ্ল মিছ ইণ্ডিয়া ৱৰ্ল্ডৰ দ্বিতীয় ৰাণাৰ্চ আপৰ খিতাপ দখল কৰিছে ডিব্ৰুগড়ৰ কংকনা বৰুৱাই । এই খিতাপ দখলৰ পাচতে ৰাজ্যৰ লগতে ডিব্ৰুগড় জিলাকো গৰ্বিত কৰা কংকনাই দক্ষিণ ভাৰতৰ বোলছবিত অভিনয়ৰ বাবে প্ৰস্তাৱ লাভ কৰিছে । 9 নৱেম্বৰত ৰাজস্থানৰ পুষ্কৰত অনুষ্ঠিত ডেজ্ল মিছ ইণ্ডিয়া ৱৰ্ল্ড প্ৰতিযোগিতাৰ দ্বিতীয় ৰাণাৰ্চ আপ খিতাপ দখল কৰি ৰাষ্ট্ৰীয় পেক্ষাপটত উজ্বলিবলৈ সক্ষম হৈছে কংকনা ৷ মিছ আচাম ইণ্ডিয়া উপাধিৰেও বিভূষিত হৈছিল ডিব্ৰুগড়ৰ নিৱাসী তথা আকাশবাণী কেন্দ্ৰৰ অৱসৰপ্ৰাপ্ত গাণনিক বিষয়া প্ৰণৱ বৰুৱা আৰু মৃদুলা বৰুৱাৰ দ্বিতীয় সন্তান কংকনা ৷ উল্লেখ্য যে, স্তন কেঞ্চাৰ ৰোগৰ সজাগতাৰ উদেশ্যি আয়োজিত এই ইভেন্ট ক্ৰমে মিছ ইণ্ডিয়া ৱৰ্ল্ড আৰু মিছেছ ইণ্ডিয়া দুটা ভাগত অনুষ্ঠিত হৈছিল ।
হাইদৰাবাদৰ এটা মাল্টি নেশ্বনেল কোম্পানীত মানৱ সম্পদ বিষয়া হিচাপে কৰ্মৰত কংকনাই ডিব্ৰুগড় বিশ্ববিদ্যালয়ৰ পৰা 'সাংবাদিকতা আৰু গণ মাধ্যম'ৰ পাঠ্যক্ৰম গ্ৰহণ কৰিছিল ৷ অসমৰ বিভিন্ন স্থানত চাকৰি কৰাৰ পাচত উচ্চাভিলাষী কংকনাই নিজৰ প্ৰতিভা বিকাশৰ বাবে হায়দৰাবাদলৈ গমন কৰিছিল ৷
ৰাজস্থানত অনুষ্ঠিত প্ৰতিযোগিতাত দেশৰ বিভিন্ন ৰাজ্যৰ পৰা নিৰ্বাচিত চূড়ান্ত 22 গৰাকী প্ৰতিযোগীয়ে অংশগ্ৰহণ কৰিছিল ৷ কংকনাই জানিবলৈ দিয়া অনুসৰি, দক্ষিণ ভাৰতৰ প্ৰযোজক শ্ৰীকান্ঠ দিপালাই কংকনাক তেওঁৰ পৰৱৰ্তী ছবিত অভিনয়ৰ বাবে প্ৰস্তাৱ আগবঢ়াইছে ৷ প্ৰতিযোগিতাত অংশগ্ৰহণৰ বাবে কিদৰে নিজৰ পিতৃক সৈমান কৰিছিল তথা প্ৰতিযোগিতাৰ বাবে কৰা প্ৰস্তুতি সম্পৰ্কেও জানিবলৈ দিয়ে কংকনাই ৷ ভৱিষ্যতে অসমত কৰ্কট ৰোগীসকলৰ বাবে বিশেষ পদক্ষেপ গ্ৰহণ কৰিব বিচাৰে বুলি জনাই কংকনাই ৷ লগতে গৃহভূমি ডিব্ৰুগড়ত এনে ধৰণৰ ইভেন্টৰ প্ৰস্তুতি আৰু প্ৰশিক্ষণৰ ইনষ্টিটিউট গঢ়ি তুলিব বুলি জানিবলৈ দিয়ে কংকনা বৰুৱাই ৷
আৰু পঢ়ক :গুৱাহাটী বিশ্ববিদ্যালয়ত কোচ ৰাজবংশী ছাত্ৰ সন্থাৰ বাৰ্ষিক অধিৱেশন
