ডিব্ৰুগড়, 25 জুলাই: ক’ভিড-19 ত আক্ৰান্ত হৈ যোৱা 22 জুলাই তাৰিখে শেষ নিশ্বাস ত্যাগ কৰিছিল নামৰূপ আৰক্ষী চকীৰ মহিলা কনিষ্টবল পুনি মেচ পালে ৷ শুকুৰবাৰে ডিব্ৰুগড় আৰক্ষী প্ৰশাসনৰ তৰফৰ পৰা শেষ শ্ৰদ্ধাঞ্জলি জ্ঞাপন কৰা হয় মহিলা কনিষ্টবলগৰাকীক ৷ দীৰ্ঘদিন ধৰি প্ৰশাসনিক সেৱা আগবঢ়োৱা পুনি মেচক শেষ চালামীৰে বিদায় জনাই ডিব্ৰুগড় জিলা প্ৰশাসনৰ মহিলা চালামী দলে ৷
উল্লেখ্য যে, অসম জাতীয়তাবাদী যুৱ ছাত্ৰ পৰিষদৰ জয়পুৰ শাখাৰ সভাপতি তৰুণ পালৰ পত্নী মৃত পুনি মেচ পাল মহিলা আৰক্ষী হোৱাৰ উপৰিও এগৰাকী প্ৰতিভা সম্পন্ন ৰাষ্ট্ৰীয় পৰ্যায়ৰ ভলীবল খেলুৱৈও আছিল ।
দুবাৰকৈ ৰাষ্ট্ৰীয় ভলীবল প্ৰতিযোগিতাত অসম দলক প্ৰতিনিধিত্ব কৰি কৃতিত্ব অৰ্জন কৰাৰ লগতে জিলা খনলৈও গৌৰৱ কঢ়িয়াই আনিবলৈ সক্ষম হৈছিল পুনি মেচে ৷
বৃক্কজনীত ৰোগত আক্ৰান্ত হৈ বিগত 19 জুলাইৰ পৰা ডিব্ৰুগড় অসম চিকিৎসা মহাবিদ্যালয় হাস্পতালত চিকিৎসাধীন হৈ আছিল পুনি মেচ ৷ অৱশেষত 22 জুলাই তাৰিখে শেষ নিশ্বাস ত্যাগ কৰিছিল মহিলা কনিষ্টবলগৰাকীয়ে ৷ পৰিতাপৰ কথা এই যে, মৰোণত্তৰ পৰীক্ষাত হে ধৰা পৰে যুৱতীগৰাকীৰ দেহত ক’ভিড-19 ৰ উপস্থিতিৰ কথা । 32 বছৰীয়া পুনি মেচে মৃত্যুৰ সময়ত স্বামী তৰুণ পালৰ লগতে তেওঁৰ এগৰাকী 9 বছৰীয়া কণমানি পুত্ৰ সন্তানক ইহ সংসাৰত এৰি থৈ যায় ।
লগতে চাওক-বাৰেকুৰিত বাঘজানৰ তৈলক্ষেত্ৰৰ অগ্নি নিৰ্বাপনৰ দাবীত প্ৰতিবাদ
