বৈদ্যুতিক গাড়ী নিৰ্মাণ কৰিব জেগুৱাৰ লেণ্ড ৰ'ভাৰ আৰু ব্ৰিটিছ মটৰ ৱৰ্কছে

বৈদ্যুতিক প্ৰযুক্তিৰ ওপৰত এতিয়াৰে পৰা একেলগে কাম কৰিব প্ৰখ্যাত গাড়ী নিৰ্মাতা প্ৰতিষ্ঠান জেগুৱাৰ লেণ্ড ৰ'ভাৰ আৰু ব্ৰিটিছ মটৰ ৱৰ্কছ, চমুকৈ বি এম ডব্লিউৱে ৷ গাড়ী নিৰ্মাণৰ ক্ষেত্ৰত নেক্সট জেন বৈদ্যুতিক প্ৰযুক্তি ব্যৱহাৰ কৰিবলৈ দুয়োটা সংস্থায়ে সুংযুক্তভাৱে কাম কৰা কথা ইতিমধ্যে ঘোষণা কৰিছে ৷

নিউজ ডেস্ক, 5 জুনঃ বিশ্ব পৰিৱেশ দিৱসৰ দিনাই পৰিৱেশ অনুকূল গাড়ী নিৰ্মানৰ ক্ষেত্ৰত আগবাঢ়ি অহাৰ কথা ঘোষণা কৰিছে বিশ্বৰ দুটাকৈ প্ৰখ্যাত গাড়ী নিৰ্মাতা প্ৰতিষ্ঠানে ৷ নেক্সট জেন বৈদ্যুতিক প্ৰযুক্তি ব্যৱহাৰ কৰি একেলগে গাড়ী নিৰ্মাণ কৰাৰ কথা ঘোষণা কৰিছে বি এম ডব্লিউ আৰু জেগুৱাৰ লেণ্ড ৰ'ভাৰে ৷

বুধবাৰে টাটা মটৰছে এক বিজ্ঞপ্তিযোগে এই কথা ঘোষণা কৰিছে ৷ সেই অনুসৰি, গাড়ী নিৰ্মাণকাৰী সংস্থাৰ ভৱিষ্যত সলনি কৰিবলৈ অট'নমাছ, কানেকটেদ, ইলেকট্ৰিক, শ্বেয়াৰদ (autonomous, connected, electric, shared) বৈশিষ্ট্যৰ ওপৰত অধিক গুৰুত্ব প্ৰদান কৰিব দুয়োটা সংস্থাই ৷

আৰু পঢ়কঃ শীঘ্ৰে মাইক্ৰছফটৰ নতুন ফিচাৰ মুকলি

উল্লেখ্য যে, জেগুৱাৰ লেণ্ড ৰ'ভাৰে ইতিমধ্যেই বৈদ্যুতিক বেটাৰীযুক্ত তথা প্লাগ-ইন-হাইব্ৰিদ বিশ্বৰ প্ৰথমখন প্ৰিমিয়াম এছইউভি বজাৰলৈ লৈ অনাৰ ক্ষেত্ৰত প্ৰচেষ্টা হাতত লৈছে ৷ সেই প্ৰচেষ্টাৰ ফলতে নিৰ্মাণকাৰী সংস্থাটোৱে সাজি উলিয়াইছে জেগুৱাৰ আই-পেচ যিখন বাহনে চলিত বৰ্ষৰ কাৰ অৱ দি ইয়েৰ সন্মান লাভ কৰিবলৈ সক্ষম হৈছে ৷ আনহাতে বিএমডব্লিউৱে 2013 চনৰ পৰাই এইক্ষেত্ৰত কাম কৰি আহিছে আৰু বহুকেইখন বাহন উপহাৰ দিবলৈ সক্ষম হৈছে ৷

দুয়োটা সংস্থাই এইক্ষেত্ৰত নিজাবৱীয়াকৈ নিৰ্মানকাৰ্যত জড়িত হ'ব যদিও প্ৰয়োজনীয় সকলো তথ্য-প্ৰযুক্তিৰ বাবে একেলগেই গৱেষণাত ব্ৰতী হ'ব দুয়োটা প্ৰতিষ্ঠানৰ অভিযন্তাসকল ৷ জেগুৱাৰে উলভাৰহাম্পটনস্থিত নিৰ্মাণগোটত ইঞ্জিন নিৰ্মাণৰ কাম কৰাৰ লগতে, বাৰ্মিংহামৰ নিকটৱৰ্তী হামছ হলত বেটাৰী নিৰ্মাণৰ কাম কৰিব ৷ দুয়োটা খণ্ডতে প্ৰায় 1600 কৰ্মীয়ে একেলগে কাম কৰিব বুলি জনাইছে জেগুৱাৰ লেণ্ড ৰ'ভাৰৰ ইঞ্জিনীয়াৰিং ডাইৰেক্টৰ নিক ৰগাৰছে ৷