ব্ৰেণ্ড ভেল্যু বৃদ্ধিৰে বিশ্বৰ সপ্তম স্থানত ভাৰত

বিশ্বযুৰি চলি থকা অৰ্থনৈতিক মন্দাৱস্থাই ভাৰতীয় অৰ্থনীতিত বেয়াকৈ প্ৰভাৱ পেলাইছে ৷ উৎপাদনৰ লগতে নিৰ্মাণখণ্ডত ভয়াৱহ সমস্যাৰ সন্মুখীন হোৱাৰ পিচটো ব্ৰেণ্ড ভেল্যু বৃদ্ধিৰে বিশ্বৰ সপ্তম স্থান দখল কৰিবলৈ সক্ষম হৈছে ভাৰতে ৷

নিউজ ডেস্ক, 13 অক্টোবৰঃ বিশ্বৰ ভিতৰতে মুল্যৱান দেশৰ তালিকাত সপ্তম স্থানলৈ উত্তীৰ্ণ হৈছে ভাৰত ৷ 2018ৰ পৰা 2019চনৰ ভিতৰত 18.7 শতাংশ ব্ৰেণ্ড ভেল্যু বৃদ্ধি পাইছে ভাৰতত ৷ 2018ত ভাৰতৰ ব্ৰেণ্ড ভেল্যুৰ পৰিমান আছিল 2,159 বিলিয়ন আমেৰিকান ডলাৰ ৷ 2019ত এই পৰিমান 2,562 বিলিয়ন আমেৰিকান ডলাৰলৈ বৃদ্ধি হয় ৷ ব্ৰেণ্ড ফাইনেন্স সংস্থাৰ বাৰ্ষিক প্ৰতিবেদনত প্ৰকাশ পাইছে এই তথ্য ৷

সংস্থাৰ প্ৰতিবেদন অনুসৰি, বিশ্বব্যাপী আৰ্থিক মন্দাৱস্থাৰ মাজতো ভাৰতীয় অৰ্থনীতিয়ে অধিক গতিৰে ধাৱমান হৈছে ৷ অৱশ্যে উৎপাদন আৰু নিৰ্মাণখণ্ডত দেশখনে সন্মুখীন হোৱা মন্দাৱস্থাৰ বাবে অৰ্থনীতিত কিছু বিৰূপ প্ৰভাৱ পৰিলক্ষিত হৈছে ৷

সংস্থাৰ প্ৰতিবেদনত ব্ৰেণ্ড ভেল্যুৰ ক্ষেত্ৰত শীৰ্ষস্থানত আছে আমেৰিকা যুক্তৰাষ্ট্ৰ ৷ আনহাতে দ্বিতীয় স্থান দখল কৰিছে চুবুৰীয়া চীনে ৷ 27,715 বিলিয়ন আমেৰিকান ডলাৰ ব্ৰেণ্ড ভেল্যুৰে শীৰ্ষস্থান দখল কৰে আমেৰিকাই ৷ বিগত বৰ্ষত আমেৰিকাই 7.2 শতাংশ ব্ৰেণ্ড ভেল্যু বৃদ্ধি কৰিছে ৷ আনহাতে দ্বিতীয় স্থানত থকা চীনৰ ব্ৰেণ্ড ভেল্যু হৈছে 19, 486 বিলিয়ন আমেৰিকান ডলাৰ ৷ বিগত বৰ্ষত চীনে 40 শতাংশলৈ ব্ৰেণ্ড ভেল্যু বৃদ্ধি কৰিবলৈ সক্ষম হৈছে ৷

উল্লেখ্য যে, এই ব্ৰেণ্ড ভেল্যু নিৰ্ণয় হয় উৎপাদন আৰু নিৰ্মাণখণ্ডৰ ওপৰত নিৰ্ভৰ কৰি ৷