নিউজ ডেস্ক, ২২ জানুৱাৰী: দেশজুৰি ছচিয়েল মিডিয়া ব্যৱহাৰৰ গোপনীয়তা সুৰক্ষাৰ ক্ষেত্ৰত বিভিন্ন প্ৰশ্ন উত্থাপন হৈ থকাৰ সময়তে শুকুৰবাৰে সংসদীয় সমিতিৰে বৈঠকত মিলিত হয় ছচিয়েল মিডিয়া টুইটাৰ আৰু ফেচবুকৰ প্ৰতিনিধিসকলে । এই বৈঠকত নাগৰিকৰ অধিকাৰ, মহিলা সুৰক্ষা, সামাজিক মাধ্যমৰ অপব্যৱহাৰ আৰু গোপনীয়তা সুৰক্ষা আদি সন্দৰ্ভত আলোচনা কৰা হয় । সংসদীয় স্থায়ী সমিতিৰ আই টিৰ প্ৰমুখ কংগ্ৰেছ সাংসদ শশী থাৰুৰৰ অধ্যক্ষতাত এই বৈঠক অনুষ্ঠিত হয় ।
আজিৰ এই বৈঠকতে সংসদৰ সদস্য বিশেষকৈ বিজেপি সাংসদসকলে কেন্দ্ৰীয় গৃহমন্ত্ৰী অমিত শ্বাহৰ টুইটাৰ একাউন্টৰ সন্দৰ্ভত আলোচনা কৰে । এইখিনিতে উল্লেখ কৰা ভাল যে, যোৱা নৱেম্বৰ মাহৰ পৰাই শ্বাহৰ টুইটাৰ একাউন্ট সাময়িকভাৱে বন্ধ কৰি ৰখা হৈছে । ইফালে ড'নাল্ড ট্ৰাম্পৰ একাউন্ট বন্ধ ৰখাক লৈও ভাৰততো এই নীতি ব্যৱহাৰ কৰা হ'ব নে নাই সেই সন্দৰ্ভতো আলোচনা কৰে ।
সূত্ৰ অনুসৰি, শ্বাহে টুইটাৰত কৰা এটা পোষ্টত কপি ৰাইট সমস্যাৰ বাবে অস্থায়ীভাৱে বন্ধ কৰি ৰখা হৈছে বুলি জনায় টুইটাৰ প্ৰতিনিধিয়ে ।
ইয়াৰোপৰি হোৱাটছ এপৰ নতুন নীতিয়ে কিদৰে ব্যৱহাৰকাৰীসকলৰ ওপৰত প্ৰভাৱ পেলাব সেই সন্দৰ্ভতো আলোচনা কৰা হয় । ফেচবুক সূত্ৰই জনোৱা অনুসৰি, এই নীতি ২০১৬ চনৰ পৰাই প্ৰয়োগ কৰা হৈছে । এইটো এটা পুৰণি নীতি । ইতিমধ্যে এই সম্পৰ্কে ফেচবুকে স্পষ্ট হৈছে বুলি জনায় ।
ইফালে বিৰোধী পক্ষৰ প্ৰশ্ন যে একাংশই ওচটনিমূলক মন্তব্য আগবঢ়াই ছচিয়েল মিডিয়াত বিভিন্ন পোষ্ট শ্বেয়াৰ কৰি আহিছে । সেই সন্দৰ্ভতো এই বৈঠকত আলোচনা কৰা হয় । এনেধৰণৰ পোষ্টে বিভ্ৰান্তিৰ সৃষ্টি কৰে । ইয়াৰ বাবে ভাৰতত এখন আইন প্ৰণয়ন কৰিব লাগে বুলি মন্তব্য কৰে বিৰোধী পক্ষই ।
বৈঠকৰ অন্তত হোৱাটছ এপৰ এগৰাকী মুখপাত্ৰই তেওঁলোকৰ মন্তব্য প্ৰকাশৰ সুযোগ দিয়াৰ বাবে সংসদীয় সমিতিক ধন্যবাদ জ্ঞাপন কৰি অনাগত দিনতো সমিতিক সহায় কৰি যাব বুলি আশ্বাস প্ৰদান কৰে ।
লগতে পঢ়ক:বাৰানসীৰ COVID-১৯ৰ টীকাকৰণৰ হিতাধিকাৰী, প্ৰতিষেধক প্ৰদানকাৰীৰে মত-বিনিময় প্ৰধানমন্ত্ৰীৰ
