নিউজ ডেস্ক,২০ ফেব্ৰুৱাৰী: দীৰ্ঘদিনৰ অন্তত ত্ৰিপুৰাত পুনৰ কৰ'ণাৰ সংক্ৰমণ । ত্ৰিপুৰাৰ স্বাস্থ্য আৰু পৰিয়াল কল্যাণ বিভাগে জনোৱা মতে ৰাজ্যখনত পুনৰ ২৬ গৰাকী লোকৰ দেহত ধৰা পৰিছে ক'ভিড-১৯ ভাইৰাছৰ অৱস্থিতি । বিভাগে প্ৰকাশ কৰা প্ৰতিবেদন অনুসৰি ৫৮১ টা নমুনা পৰীক্ষা কৰা হৈছিল য'ত ৯ টা নমুনাত শুকুৰবাৰে সন্ধিয়ালৈকে পজিটিভ পোৱা গৈছিল । অৱশ্যে পৰৱৰ্তী সময়ত পশ্চিম ত্ৰিপুৰাৰ জিলা দণ্ডাধীশ শৈলেশ কুমাৰ যাদৱে নিশ্চিত কৰে যে আক্ৰান্তৰ সংখ্যা ২৬ লৈ বৃদ্ধি পাইছে ।
জানিব পৰা মতে নতুনকৈ সংক্ৰমিত ব্যক্তিসকলৰ ভিতৰত চাৰিজন স্থানীয় কনিষ্ঠ চিকিৎসক, কিছুসংখ্যক স্বাস্থ্য কৰ্মচাৰী আৰু এগৰাকী গৰ্ভৱতী মহিলাও আছে । আক্ৰান্ত সকলক ইতিমধ্যে ত্ৰিপুৰা চিকিৎসা মহাবিদ্যালয় আৰু ড৹ বি আৰ আম্বেদকাৰ মেম'ৰিয়েল হাস্পতালত ভৰ্তি কৰোৱা হৈছে । চিকিৎসক আৰু স্বাস্থ্যকৰ্মী আক্ৰান্ত হোৱাৰ লগে লগে পশ্চিম ত্ৰিপুৰাত অধিক সংক্ৰমণৰ আশংকাত পশ্চিম ত্ৰিপুৰাৰ জিলা দণ্ডাধীশ শৈলেশ কুমাৰ যাদৱে চিকিৎসালয়ৰ বাহিৰৰ সেৱা বন্ধ কৰিবলৈ নিৰ্দেশ দিয়ে । জিলা দণ্ডাধীশৰ মতে যোৱা দুটা দিনত অৰ্থাৎ ১৮ আৰু ১৯ ফেব্ৰুৱাৰীত ৰাজ্যখনত কৰ'ণাত আক্ৰান্তৰ সংখ্যা বৃদ্ধি হৈছে ।
আনহাতে ত্ৰিপুৰা চিকিৎসা মহাবিদ্যালয়ৰ কৰ্মচাৰী আৰু ড০ বি আৰ আম্বেদকাৰ মেম'ৰিয়েল টিচিং হাস্পতালৰ কৰ্মচাৰীসকলৰ মাজত ক'ভিডৰ-১৯ত আক্ৰান্তৰ সংখ্যা বৃদ্ধি পোৱাৰ পিছতে নিয়মীয়া অ'পিডি সেৱা বন্ধ কৰাৰ নিৰ্দেশ দিয়া হৈছে । জানিব পৰা মতে, আক্ৰান্তসকলৰ সংস্পৰ্শলৈ অহা ব্যক্তিসকলক চিনাক্ত কৰাৰ প্ৰক্ৰিয়া ইতিমধ্যে আৰম্ভ কৰিছে স্বাস্থ্য বিভাগে ।
বিশেষ সূত্ৰৰ পৰা জানিব পৰা মতে এক বিবাহ অনুষ্ঠানৰ পৰা কৰ'ণাৰ সংক্ৰমণ আৰম্ভ হৈছিল । ইয়াৰ মাজতে গুৰুত্বপূৰ্ণ কথাটো হ'ল বছৰৰ আৰম্ভণিৰ পৰা এতিয়ালৈকে অতি কম সংখ্যক লোক কৰ'ণাত আক্ৰান্ত হৈছে যদিও ত্ৰিপুৰা চিকিৎসা মহাবিদ্যালয় বৰ্তমান কৰ'ণাৰ হটস্পটলৈ পৰিণত হৈছে ।
লগতে পঢ়ক:মৃত্যুদণ্ডৰে দণ্ডিত হোৱা স্বাধীন ভাৰতৰ প্ৰথম মহিলা গৰাকী
