আগৰতলা, 12 জুন : ত্ৰিপুৰাৰ মুখ্যমন্ত্ৰী বিপ্লৱ কুমাৰ দেৱে (Biplab Deb) শনিবাৰে স্বাস্থ্য বিভাগৰ বিষয়াসকলক ১৮ ৰ পৰা ৪৪ বছৰ বয়সৰ বাবে ২.৫ লাখ ভেকচিনৰ পালি আৱণ্টন কৰিবলৈ নিৰ্দেশ দিয়ে ৷ ৰাজ্যখনে এতিয়ালৈকে জনসংখ্যাৰ অনুপাতে প্ৰতিষেধক প্ৰদান কৰাৰ ক্ষেত্ৰত দেশত শীৰ্ষস্থান দখল কৰিবলৈ সক্ষম হৈছে ৷
মুখ্যমন্ত্ৰী বিপ্লৱ কুমাৰ দেৱে (Biplab Deb) অসামৰিক সচিবালয়ত ৰাজ্যখনৰ টীকাকৰণ অভিযান সন্দৰ্ভত এক গুৰুত্বপূৰ্ণ বৈঠকত সভাপতিত্ব কৰি বিষয়াসকলক ১৮ ৰ পৰা ৪৪ বছৰ বয়সৰ লোকসকলৰ বাবে টীকাকৰণ অভিযান (Vaccination drive) ত্বৰান্বিত কৰিবলৈ নিৰ্দেশ দিয়ে ৷ মুখ্যমন্ত্ৰীৰ অফিচিয়েল ফেচবুক হেণ্ডেলৰ এটা পোষ্টত উল্লেখ কৰা হৈছে এই কথা ।
ইয়াৰ উপৰিও স্বাস্থ্য বিভাগৰ দায়িত্বত থকা মুখ্যমন্ত্ৰীয়ে বৈঠকখনত প্ৰয়োজনীয় পদক্ষেপ ল'বলৈ পৰামৰ্শ দিয়ে যাতে মহামাৰীৰ সময়ত স্বাস্থ্যসেৱা প্ৰদান প্ৰণালী সুচাৰুৰূপে মানুহৰ দুৱাৰমুখলৈ যাব পাৰে ।
"প্ৰণালীটো সুশৃংখল কৰাৰ প্ৰয়োজন । প্ৰয়োজন হ'লে ক’ভিডৰে চলা এই যুঁজ চম্ভালিবলৈ অধিক শিক্ষকক অন্তৰ্ভুক্ত কৰা হ’ব । থলুৱা অধ্যুষিত জনপদসমূহত অধিকসংখ্যক লোকক টীকাকৰণৰ বাবে অগ্ৰাধিকাৰ দিয়া উচিত", মুখ্যমন্ত্ৰীৰ পোষ্টত উল্লেখ কৰিছে এই কথা ৷
তদুপৰি ক’ভিড টেষ্টৰ বিষয়ে ৰাইজৰ মাজত সজাগতা বৃদ্ধি কৰাৰ প্ৰয়োজন আছে বুলিও সামাজিক মাধ্যমৰ পোষ্টটোত উল্লেখ কৰা হৈছে ৷
লগতে পঢ়ক: ত্ৰিপুৰাত চৰকাৰী কাৰ্যালয়ত বিজেপি কৰ্মীৰ তাণ্ডৱৰ অভিযোগ
