আগৰতলা,26 মাৰ্চ : শুকুৰবাৰে দুপৰীয়াৰ ভাগত ত্ৰিপুৰাৰ অমৰপুৰ মহকুমাৰ অন্তৰ্গত লাৰ্কীৰ দোকানত সংঘটিত হয় এক ভয়াৱহ পথ দুৰ্ঘটনা ৷ দুৰ্ঘটনাটোত 4 গৰাকী ব্যক্তি নিহত হোৱাৰ বিপৰীতে 17 গৰাকী ব্যক্তি আহত হোৱা বুলি আৰক্ষীয়ে সদৰি কৰে ।
প্ৰাপ্ত তথ্য অনুসৰি, নিহত আৰু আহত কেইগৰাকী বিজেপি দলৰ সমৰ্থক আৰু তেওঁলোকে মুখ্যমন্ত্ৰী বিপ্লৱ কুমাৰ দেৱে অংশগ্ৰহণ কৰা বিজেপিৰ নিৰ্বাচনী ৰেলীৰ পৰা উভতি আহিছিল ৷ তেওঁলোকে গৈ থকা বাহনখনে অমৰপুৰ-নুতান বজাৰ পথত নিয়ন্ত্ৰণ হেৰুৱাই পথৰ কাষত বাগৰি পৰে ।
আহতসকলক লগে লগে অমৰপুৰ উপ-বিভাগীয় চিকিৎসালয়লৈ নিয়া হয় । কেইগৰাকীমানৰ অৱস্থা সংকটজনক বুলি জানিব পৰা গৈছে । আনহাতে ঘটনাস্থলীতে 4 গৰাকী ব্যক্তি নিহত হয় ৷ আহত 17 গৰাকীৰ ভিতৰত 7 গৰাকীক গোমতী জিলা চিকিৎসালয়লৈ প্ৰেৰণ কৰা হয় আৰু বাকী কেইগৰাকীক অমৰপুৰ চিকিৎসালয়ত ভৰ্তি কৰোৱা হয় ।
ইফালে ৰাজ্যখনৰ মুখ্যমন্ত্ৰী দেৱে ব্যক্তি 4 গৰাকীৰ মৃত্যুত শোক প্ৰকাশ কৰিছে আৰু শোকসন্তপ্ত পৰিয়ালৰ প্ৰতি গভীৰ সহানুভূতি প্ৰকাশ কৰিছে । আনহাতে আহতসকলৰ দ্ৰুত আৰোগ্যৰ কামনা কৰে মুখ্যমন্ত্ৰী গৰাকীয়ে ।
লগতে পঢ়ক : ৰিগিং কৰা ভোট: নিৰ্বাচনী আয়োগক দোষাৰোপ চিপিআইৰ
