নিউজ ডেস্ক, 23 অক্টোবৰ : উত্তৰ প্ৰদেশৰ মন্ত্ৰী তথা ভাৰতীয় জনতা পাৰ্টিৰ নেতা দানিছ আজাদ আনছাৰীয়ে দেওবাৰে সমাজবাদী পাৰ্টিৰ মুৰব্বী অখিলেশ যাদৱক “ভৱিষ্যতৰ প্ৰধানমন্ত্ৰী” বুলি চিত্ৰিত কৰা পোষ্টাৰক লৈ আক্ৰমণ কৰে দলটোক ৷ আনছাৰীয়ে কয় যে সমাজবাদী দলে দিবাস্বপ্ন দেখিছে ৷ প্ৰধানমন্ত্ৰী নৰেন্দ্ৰ মোদীৰ ওপৰত ৰাইজৰ বিশ্বাস আছে ৷
আনছাৰীয়ে কয় " 'মুংগেৰী লাল কে হাছিন স্বপনে' বুলি এষাৰ কথা আছে ৷ দিবাস্বপ্ন দেখাত কোনেও কাকো বাধা দিব নোৱাৰে ৷ কিন্তু নিজৰ সামৰ্থ্য অনুসৰি সপোন দেখা উচিত ৷ পি এম মোদীৰ নেতৃত্বত আমাৰ দেশ উন্নয়নৰ পথত আগবাঢ়িছে ৷" লগতে দেশৰ মানুহে প্ৰধানমন্ত্ৰী মোদীক বিশ্বাস কৰে আৰু দেশে তৃতীয়বাৰৰ বাবে মোদীক নিশ্চিতভাৱে প্ৰধানমন্ত্ৰী হিচাবে নিৰ্বাচিত কৰিব বুলিও তেওঁ দৃঢ়তাৰে কয় ৷
ইয়াৰ পূৰ্বে সোমবাৰে লক্ষ্নৌস্থিত দলৰ মুখ্য কাৰ্যালয়ৰ বাহিৰত সমাজবাদী পাৰ্টিৰ মুৰব্বী অখিলেশ যাদৱক "ভৱিষ্যতৰ প্ৰধানমন্ত্ৰী" ৰূপে চিত্ৰিত কৰা কেইবাখনো পোষ্টাৰ দলৰ কৰ্মীসকলে স্থাপন কৰে ৷
সমাজবাদী পাৰ্টীৰ মুখপাত্ৰ ফখৰুল হাছান চান্দে কয় "অখিলেশ যাদৱৰ জন্মদিন 1 জুলাইত ৷ কিন্তু নেতাজনৰ প্ৰতি থকা মৰম আৰু শ্ৰদ্ধা প্ৰকাশৰ বাবে সমাজবাদী পাৰ্টিৰ কৰ্মীসকলে তেওঁৰ জন্মদিন একাধিকবাৰ উদযাপন কৰে ৷ আজি দলৰ একাংশ নেতা কৰ্মীয়ে তেওঁৰ জন্মদিন উদযাপন কৰিছে ৷ দলীয় কৰ্মীসকলে অখিলেশ যাদৱ দেশৰ প্ৰধানমন্ত্ৰী হৈ জনসাধাৰণৰ সেৱা কৰিবলৈ প্ৰাৰ্থনা কৰিছে |"
অখিলেশ যাদৱৰ সমাজবাদী পাৰ্টি I.N.D.I.A ব্লকৰ মিত্ৰ ৷ 2024 চনত লোকসভা নিৰ্বাচনত ভাৰতীয় জনতা পাৰ্টিৰ বিৰুদ্ধে প্ৰতিদ্বন্দ্বিতা কৰিবলৈ গঠন কৰা 28 টা ৰাজনৈতিক দলৰ মিত্ৰতা I.N.D.I.A ব্লক ৷ অৱশ্যে মিত্ৰজোঁটে এতিয়ালৈকে প্ৰধানমন্ত্ৰী পদৰ প্ৰাৰ্থীৰ নাম ঘোষণা কৰা নাই ৷
লগতে পঢ়ক : Beautification of Gyanvapi : সম্ৰাজ্ঞী বাইজা বায়ে কৰিছিল জ্ঞানবাপীৰ সৌন্দৰ্যবৰ্ধন: জ্যোতিৰাদিত্য সিন্ধিয়া
