নিউজ ডেস্ক, ২২ জুন : কংগ্ৰেছ, আপ আৰু তৃণমূলকে ধৰি ১৮ টা বিৰোধী দলৰ নেতাসকলে ২৩ জুনত বিহাৰৰ ৰাজধানী পাটনাত মিলিত হোৱাৰ কথা । এই বিষয়ে বহুতো ৰাজনৈতিক ভাষ্যও আহিছে । আনহাতে, নিৰ্বাচনী ৰণনীতিবিদ তথা জন সূৰযৰ আহ্বায়ক প্ৰশান্ত কিশোৰে এই বৈঠকখনক কঠোৰভাৱে সমালোচনা কৰিছে । প্ৰশান্ত কিশোৰে কয় যে পাঁচ বছৰ পূৰ্বে অন্ধ্ৰপ্ৰদেশৰ মুখ্যমন্ত্ৰী চন্দ্ৰবাবু নাইডুয়েও এই ভূমিকা পালন কৰিছিল ।
পিকে নামেৰে খ্যাত নিৰ্বাচনী ৰণকৌশলীগৰাকীয়ে কয় যে চন্দ্ৰবাবু নাইডুৱে সেই সময়ত অন্ধ্ৰপ্ৰদেশত সংখ্যাগৰিষ্ঠ চৰকাৰ চলাই আছিল । আনহাতে, নীতিশ কুমাৰে আজি ৪২ জন বিধায়কেৰে এখন পংগু চৰকাৰ চলাই আছে । চন্দ্ৰবাবু নাইডুৱে সেই সময়ত সমগ্ৰ দেশ ভ্ৰমণ কৰি বিৰোধীক একত্ৰিত কৰিছিল । ফলস্বৰূপে অন্ধ্ৰপ্ৰদেশত তেওঁলোকৰ সাংসদ তিনিজনলৈ হ্ৰাস পাইছিল । মাত্ৰ ২৩ জন বিধায়ক জয়ী হৈছিল আৰু তেওঁ ৰাজ্যখনত ক্ষমতাৰ পৰা বাহিৰ হৈছিল ।
"নীতিশ কুমাৰে বিহাৰৰ বিষয়ে চিন্তা কৰা উচিত । নীতিশ কুমাৰৰ নিজা কোনো স্থান নাই । আজি বিহাৰত আৰজেডি দলৰ সাংসদৰ সংখ্যা শূন্য । আৰু সেইটো দলেই দেশৰ প্ৰধানমন্ত্ৰীৰ সিদ্ধান্ত লৈছে । যিটো দলৰ নিজা ভিত্তি নাই, তেওঁলোকে দেশৰ আন দলসমূহক একত্ৰিত কৰি আছে ।" জন সূৰযৰ আহ্বায়ক প্ৰশান্ত কিশোৰে কয় ।
কোনোবাই তেওঁৰ নিজৰ ৰাজ্যত আন কাৰোবাক আসন এৰি দিব নেকি ? প্ৰশান্ত কিশোৰে কয় যে নীতিশ কুমাৰক সুধিব লাগে যে মমতা বেনাৰ্জী কংগ্ৰেছৰ সৈতে কাম কৰিবলৈ সাজু নেকি ? নীতিশ কুমাৰ আৰু লালুৱে বিহাৰত তৃণমূলক এখন আসন দিবলৈ সাজু নেকি ? নীতিশ কুমাৰে মমতা বেনাৰ্জীক আমাতকৈ বেছি জানে নেকি ? পশ্চিমবংগত নীতিশ কুমাৰক কোনে পাত্তা দিয়ে ? আপোনালোকে মোৰ কথাবোৰ লিখি ৰাখিব আৰু সময়ত দেখিব নীতিশ কুমাৰেও চন্দ্ৰবাবু নাইডুৰ দৰে একে পৰিস্থিতিৰ সন্মুখীন হ'ব ।
কেৱল সিমানেই নহয়, নীতিশ কুমাৰক ক্ষুৰধাৰ সমালোচনা কৰি পিকেয়ে কয়, "আজি নীতিশ কুমাৰৰ অৱস্থা অন্ধৰ ৰাজ্যত কণা ৰজাৰ দৰে । বিৰোধীৰ সভালৈ অহা সকলো ৰাজনৈতিক দলৰ লোকে কেৱল চাহ খাব, ভোজ খাব । তাৰ বাহিৰে আন একো ফল নোলাব । সিদ্ধান্ত এইটো হ'ব যে নীতিশ কুমাৰে মহাজোঁট ত্যাগ কৰিব আৰু পুনৰ এনডিএত যোগদান কৰিব ।
লগতে পঢ়ক :Oppositions Patna Meeting : নীতিশ কুমাৰ ডলাৰ বগৰী; নিজৰ ঘৰতে বিহাৰৰ মুখ্যমন্ত্ৰীক উপহাস আপৰ
