নিউজ ডেস্ক, 5 অক্টোবৰ : প্ৰধানমন্ত্ৰী নৰেন্দ্ৰ মোডী মঙলবাৰে পুৱা লক্ষ্ণৌত উপস্থিত হয় । স্বাধীনতাৰ অমৃত মহোৎসৱৰ অংশ হিচাপে লক্ষ্নৌ ইন্দিৰা গান্ধী ফাউণ্ডেশ্যনত আয়োজিত এক অনুষ্ঠানত অংশগ্ৰহণ কৰাৰ উদ্দেশ্যৰে লক্ষ্ণৌত উপস্থিত হয় প্ৰধানমন্ত্ৰী ৷ স্বাধীনতাৰ অমৃত মহোৎসৱৰ লগত সংগতি ৰাখি লক্ষ্নৌৰ পৰা কেইবাটাও গুৰুত্বপূৰ্ণ প্ৰকল্পৰ আধাৰশিলা স্থাপন কৰিব প্ৰধানমন্ত্ৰীয়ে ।
লখিমপুৰ খেৰীৰ ঘটনাই উত্তৰ প্ৰদেশৰ ৰাজনৈতিক অস্থিৰতা বৃদ্ধি কৰিছে । খেৰী কেলেংকাৰীৰ ফলত সৃষ্টি হোৱা অস্থিৰতাৰ মাজতে প্ৰধানমন্ত্ৰী মোদীৰ ৪ ঘণ্টীয়া লক্ষ্ণৌ ভ্ৰমণৰ বাবে অধিক তৎপৰ হৈ পৰিছে আৰক্ষী-প্ৰশাসন ৷ লক্ষ্ণৌত কটকটীয়া নিৰাপত্তা বেষ্টনী গঢ়ি তোলাৰ লগতে ৰাজপথ আৰু মহল্লাত থকা দুৰ্বৃত্তসকলক চিনাক্ত কৰা হৈছে । ইয়াৰ লগতে ক'লা পতাকা প্ৰদৰ্শন কৰাৰ সম্ভাৱনা থকা লোকসকলকো গ্ৰেপ্তাৰ কৰা আৰম্ভ কৰিছে আৰক্ষীয়ে ৷
অনুষ্ঠানত গৃহ আৰু নগৰ পৰিক্ৰমা মন্ত্ৰালয়ৰ নগৰ অভিযান (অমৃত, স্মাৰ্ট চিটি, স্বচ্ছ ভাৰত অভিযান, প্ৰধানমন্ত্ৰী আৱাস যোজনা নগৰ)ৰ বিভিন্ন আঁচনি আৰু সাফল্যসমূহৰ এখন চলচ্চিত্ৰ প্ৰদৰ্শন কৰা হ’ব । প্ৰধানমন্ত্ৰী মোদীয়ে পি এম আই নগৰৰ ৭৫ খন জিলাত ৭৫ হাজাৰ হিতাধিকাৰীক চাবি হস্তান্তৰ কৰাৰ লগতে ডিজিটেল মাধ্যমেৰে ৫ গৰাকী হিতাধিকাৰীৰ সৈতে বাৰ্তালাপ কৰিব । ইয়াৰ লগতে স্মাৰ্ট চিটি মিছনৰ অধীনত উত্তৰ প্ৰদেশৰ ১০ খন স্মাৰ্ট চিটিৰ ৭৫ টা সফল প্ৰকল্পৰ এখন কফি টেবুল বুকো মুকলি কৰিব প্ৰধানমন্ত্ৰীয়ে ।
প্ৰধানমন্ত্ৰীয়ে লক্ষ্ণৌত স্মাৰ্ট চিটিৰ অধীনত ১৫৩৭.০২ কোটি টকাৰ ১৫ টা উন্নয়নমূলক প্ৰকল্প মুকলি কৰিব আৰু ১২৫৬.২২ কোটি টকাৰ ৩০ টা উন্নয়নমূলক প্ৰকল্পৰ আধাৰশিলা স্থাপন কৰিব । ইয়াৰ উপৰি অমৃত অভিযানৰ অধীনত ৫০২. ২৪ কোটি টকাৰ ১৭ টা খোৱাপানীৰ প্ৰকল্প মুকলি কৰা হ'ব আৰু ১৪৪১.৭০ কোটি টকাৰ ১৩ টা প্ৰকল্পৰ আধাৰশিলা স্থাপন কৰা হ'ব । ইয়াৰ লগতে, ৰাজ্যখনৰ বিভিন্ন চহৰত প্ৰায় 75 খন বৈদ্যুতিক বাছো মুকলি কৰিব প্ৰধানমন্ত্ৰীয়ে ৷ প্ৰধানমন্ত্ৰী মোডীৰ এই কাৰ্যসূচীৰ সময়ত কেন্দ্ৰীয় মন্ত্ৰী হৰদীপ সিং পুৰী, মুখ্যমন্ত্ৰী যোগী আদিত্যনাথ আৰু ৰাজ্যপাল আনন্দী বেন পেটেল উপস্থিত থাকিব ।
লগতে পঢ়ক : বিশ্বজুৰি হঠাৎ স্থৱিৰ হৈ পৰিল হোৱাটচ এপ-ফেচবুক-ইনষ্টাগ্ৰাম !
