নিউজ ডেস্ক, ২৪ জুলাই : সোমবাৰে ছত্তীশগড়ৰ বংকিমোংৰা আৰক্ষী থানাৰ অন্তৰ্গত সুমেধা নাগিনভান্থা অঞ্চলত শুই থকা অৱস্থাত এটা জেঠী মুখত সোমাই যোৱাৰ ফলত এটি আঢ়ৈ বছৰীয়া ল'ৰা শিশুৰ মৃত্যু হয় । ঘটনাটো পুৱা ৮.৩০ বজাত সংঘটিত হয় । উল্লেখ্য যে প্ৰাণীবিজ্ঞানীসকলে বিশ্বাস কৰে যে ঘৰুৱা জেঠীবোৰ ইমান বিষাক্ত নহয় যে সিহঁত তৎক্ষণাৎ কাৰোবাক মাৰি পেলাব পাৰে । অৱশ্যে আৰক্ষীয়ে ঘটনাটোৰ তদন্ত কৰি আছে আৰু শিশুটোৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে । মৰণোত্তৰ পৰীক্ষাৰ প্ৰতিবেদন অহাৰ পিছতহে মৃত্যুৰ প্ৰকৃত কাৰণ প্ৰকাশ কৰা হ'ব বুলি আৰক্ষীয়ে জানিবলৈ দিয়ে ।
ৰাজকুমাৰ চান্দেৰ পৰিয়ালটো নাগিনভান্থা অঞ্চলৰ বাসিন্দা । তেওঁৰ তিনিটা সন্তানৰ ভিতৰত কনিষ্ঠ আঢ়ৈ বছৰীয়া পুত্ৰ জগদীশ সোমবাৰে পুৱা ৮.৩০ বজাত বিছনাত শুই আছিল । কিন্তু সেই সময়ত হঠাতে মাতৃৰ চকু শিশুটোৰ ওপৰত পৰে । শিশুটোৰ মুখত এটা জেঠী দেখি তেওঁ হতবাক হৈ চিঞৰিবলৈ ধৰে । যেতিয়া তেওঁ আৰু চুবুৰীয়া শিশুটোৰ ওচৰলৈ যায়, তেওঁলোকে দেখে শিশুটিৰ উশাহ বন্ধ হৈ আছিল । আনহাতে, জেঠীটো শিশুটিৰ মুখত সোমাই আছিল । ইতিমধ্যে জেঠী আৰু শিশু দুয়োৰে মৃত্যু হৈছিল ।
আঢ়ৈ বছৰীয়া জগদীশ কোঠাটোত সম্পূৰ্ণ অকলে আছিল । ইতিমধ্যে অঞ্চলটোত আঢ়ৈ বছৰীয়া শিশুটিৰ এনেদৰে মৃত্যু হোৱা খবৰে চাঞ্চল্যৰ সৃষ্টি কৰিছে । জেঠীটোৰ বিষৰ ফলত শিশুটোৰ মৃত্যু হৈছিল নে আন কোনো কাৰণত, সেয়া অৱশ্যে পোষ্টমৰ্টেম ৰিপোৰ্টৰ পিছতহে জানিব পৰা যাব । আনহাতে, পিতৃ-মাতৃৰ অনুপস্থিতিত শিশুটোৰ কি হৈছিল আৰু কেনেকৈ জেঠীটো তেওঁৰ মুখত প্ৰৱেশ কৰিছিল সেয়াও অনুসন্ধানৰ বিষয় হৈ পৰিছে ।
জানিব পৰা মতে, শিশুটিৰ মাতৃ কিবা কামৰ বাবে ওচৰৰ দোকানলৈ গৈছিল । আনহাতে, পিতৃ গৈছিল পুখুৰীৰ ফালে । এই সময়ছোৱাতে ঘটনাটো ঘটা বুলি কোৱা হৈছে । তেনে অৱস্থাত শিশুটো অকলে শুই আছিল । কিন্তু জেঠীটো কেনেকৈ তেওঁৰ মুখত প্ৰৱেশ কৰিছিল সেয়া জানিব পৰা হোৱা নাই । কিন্তু যেতিয়া আমি গৈ দেখিছিলোঁ, তেতিয়া শিশুটিৰ হৃদস্পন্দন বন্ধ হৈ গৈছিল । শিশুটিৰ পিতৃ ৰাজকুমাৰ চান্দেয়ে কয় ।
আনহাতে, চৰকাৰী ইভিপিজি মহাবিদ্যালয়ৰ প্ৰাণীবিজ্ঞানৰ সহকাৰী অধ্যাপক বলৰাম কুৰে জেঠীটোৰ বিষৰ ফলত শিশুটোৰ মৃত্যুৰ হোৱা কথাটোত একমত নহয় । তেওঁৰ মতে, কাৰোবাক হত্যা কৰিবলৈ পৰ্যাপ্ত বিষ জেঠীৰ তাত নাই । প্ৰাণীবিজ্ঞানীগৰাকীৰ এই দাবীৰ পিছত এতিয়া শিশুটোৰ মৃত্যুক লৈ ৰহস্যৰ সৃষ্টি হৈছে । কিয়নো ঘটনাটোৰ সময়ত শিশুটি ঘৰত সম্পূৰ্ণ অকলশৰীয়াভাৱে আছিল ।
উল্লেখ্য যে ঘৰত পোৱা জেঠীত কাৰোবাক হত্যা কৰিব পৰাকৈ পৰ্যাপ্ত বিষ নাই । যদি জেঠীটো মুখত প্ৰৱেশ কৰে তেনেহ'লে শ্বাসনলীৰে শ্বাস-প্ৰশ্বাস বন্ধ হোৱাৰ ফলতো শিশুটোৰ মৃত্যু হ'ব পাৰে । অৱশ্যে ঘৰুৱা জেঠীবোৰত কিছু পৰিমাণৰ বিষ থাকে, যাৰ ফলত খাদ্যত বিষক্ৰিয়া বা কলেৰা ৰোগ হ'ব পাৰে । সেয়েহে শিশুটোৰ মৃত্যুৰ প্ৰকৃত কাৰণ কি সেয়া অনুসন্ধানৰ বিষয় । প্ৰাণীবিজ্ঞানৰ সহকাৰী অধ্যাপক বলৰাম কুৰেয়ে কয় ।
ইফালে ঘটনাটোৰ বিষয়ে তথ্য লাভ কৰাৰ পিছতে স্থানীয় আৰক্ষী গৈ ঘটনাস্থলীত উপস্থিত হয় । ইতিমধ্যে বিষয়টোৰ তদন্ত আৰম্ভ কৰা হৈছে । প্ৰাথমিকভাৱে অনুমান কৰা হৈছে যে জেঠীটোৱে মুখত কামোৰাৰ ফলতে শিশুটিৰ মৃত্যু হৈছে । হেড কনিষ্টবল যোগেশ ৰাত্ৰে আৰু বাকিমোংগ্ৰা আৰক্ষী থানাৰ মহিলা হেড কনিষ্টবল ঘটনাস্থলীত উপস্থিত হৈ সোধাপোছা সম্পূৰ্ণ কৰে । এতিয়া মৰণোত্তৰ পৰীক্ষাৰ প্ৰতিবেদন পোৱাৰ পিছতহে মৃত্যুৰ প্ৰকৃত কাৰণ জানিব পৰা যাব বুলি আৰক্ষীয়ে প্ৰকাশ কৰিছে ।
লগতে পঢ়ক :Junagadh Building collapsed : জুনাগড়ত খহি পৰিল অতি পুৰণি দুমহলীয়া অট্টালিকা
