নিউজ ডেস্ক, ১০ নৱেম্বৰ : এসময়ত নীতিশ কুমাৰ অতি ঘনিষ্ঠ হিচাপে পৰিগণিত হাম দলৰ পিতৃপুৰুষ জিতন ৰাম মাঝিয়ে মনত গভীৰ দুখ পাইছে । উল্লেখ্য যে বৃহস্পতিবাৰে মুখ্যমন্ত্ৰী নীতিশ কুমাৰে বিধানসভাৰ মজিয়াত মাঝিৰ বিৰুদ্ধে তীব্ৰ বাক্যবাণ নিক্ষেপ কৰে । ইয়াৰ বিৰুদ্ধে এনডিএয়ে আন্দোলন আৰম্ভ কৰিছে । আনহাতে, বিহাৰৰ প্ৰাক্তন মুখ্যমন্ত্ৰী জিতন ৰাম মাঝিয়ে বিধানসভাৰ অধ্যক্ষ অৱধ বিহাৰী চৌধুৰীৰ চেম্বাৰৰ বাহিৰত ধৰ্ণাত বহে । এই সময়ত সংবাদ মাধ্যমৰ সৈতে বাৰ্তালাপত তেওঁ মুখ্যমন্ত্ৰী নীতিশ কুমাৰৰ বিৰুদ্ধে গভীৰ ষড়যন্ত্ৰৰ অভিযোগ উত্থাপন কৰে ।
জিতন ৰাম মাঝিয়ে দাবী কৰে যে নীতিশ কুমাৰৰ বিৰুদ্ধে এক ডাঙৰ ষড়যন্ত্ৰ ৰচনা কৰা হৈছে । আন কোনোবাই যাতে সোনকালে মুখ্যমন্ত্ৰীৰ পদ লাভ কৰে তাৰ বাবে এই ষড়যন্ত্ৰ ৰচনা কৰিছে । মাঝিয়ে কয় যে বিগত কেইবাদিনো ধৰি নীতিশ কুমাৰক খাদ্যৰ সৈতে বিষাক্ত পদাৰ্থ মিহলাই প্ৰদান কৰা হৈছে । ইয়াৰ ফলস্বৰূপেই তেওঁ মহাবীৰ চৌধুৰীৰ ফটোত মাল্যদান কৰাৰ পৰিৱৰ্তে জীৱিত অশোক চৌধুৰীলৈ পুষ্পাঞ্জলি কৰে ।
"মোৰ দৰে এগৰাকী ৮০ বছৰীয়া প্ৰতিনিধিক এগৰাকী ৭৪ বছৰীয়া মুখ্যমন্ত্ৰীয়ে তাচ্ছিল্য কৰিছে । তেওঁ ১৯৬৭-৬৮ চনত ডিগ্ৰী লাভ কৰিছিল । মই ১৯৬৬ চনতে মোৰ ডিগ্ৰী লাভ কৰিছিলোঁ । মই ১৯৮০ চনতে বিধায়ক আছিলোঁ আৰু নীতিশ ১৯৮৫ চনত বিধায়ক হৈছিল । তেওঁ মোক তুমি বুলি সম্বোধন কৰি কথা পাতিব নালাগিছিল ।" বিহাৰৰ প্ৰাক্তন মুখ্যমন্ত্ৰী জিতন ৰাম মাঝিয়ে কয় ।
জিতন ৰাম মাঝিয়ে লগতে কয় যে নীতিশ কুমাৰে সকলো মৰ্যাদা অতিক্ৰম কৰি মহিলাসকলৰ বিৰুদ্ধে বিভিন্ন কথা কৈছে । এই সকলোবোৰ বিষয়ত সকলোৱে জ্ঞাত হৈ পৰিছে । তেওঁৰ ভাষা শুনি মই কৈছিলোঁ যে তেওঁৰ মূল্যবোধৰ অৱক্ষয় ঘটিছে, সেয়েহে তেওঁ এনে ভাষা ব্যৱহাৰ কৰি আছে । অধ্যক্ষগৰাকী হৈছে বিধানসভাৰ ৰক্ষক । যেতিয়া সংৰক্ষণৰ বিষয়টো শেষ হৈছিল তেতিয়া তেওঁ মোক সুবিধা দিছিল আৰু মই মোৰ বক্তব্য আগবঢ়াবলৈ আৰম্ভ কৰিছিলোঁ । অধ্যক্ষই নীতিশ কুমাৰক বাধা দিব লাগিছিল ।
লগতে পঢ়ক :Mahua Moitra expulsion threat : নৈতিকতা সমিতিৰ বহিষ্কাৰৰ সিদ্ধান্তক তীব্ৰ সমালোচনা মহুৱা মৈত্ৰৰ
