নিউজ ডেস্ক, ৯ জানুৱাৰী : ভাৰতীয় কমিউনিষ্ট পাৰ্টীৰ ৰাষ্ট্ৰীয় সাধাৰণ সম্পাদক ডি ৰাজাই ইটিভি ভাৰতক এক বিশেষ সাক্ষাৎকাৰত কয় যে তেওঁ শীঘ্ৰেই আসন ভাগ-বাটোৱাৰা সম্পূৰ্ণ কৰাৰ বিষয়ে আলোচনা কৰিবলৈ মুখ্যমন্ত্ৰী নীতিশ কুমাৰক সাক্ষাৎ কৰিছে । সোমবাৰে সন্ধিয়া বিহাৰৰ পাটনাত নীতিশ কুমাৰৰ সৈতে হোৱা বৈঠকত ইণ্ডিয়াৰ মিত্ৰতা শক্তিশালী কৰাৰ বিষয়ে আলোচনা হয় । তেওঁ কয় যে আসন ভাগ-বাটোৱাৰাত কোনো পলম হোৱা নাই । শীঘ্ৰেই এই সন্দৰ্ভত সূত্ৰ প্ৰকাশ কৰা হ'ব ।
"নীতিশ কুমাৰ মিত্ৰজোঁটৰ এক গুৰুত্বপূৰ্ণ সহযোগী । বিজেপিৰ বিৰুদ্ধে কেনেদৰে যুঁজ দিব লাগে, এই সকলোবোৰ বিষয় বিতংভাৱে আলোচনা কৰা হৈছে । আসন ভাগ-বাটোৱাৰাত এতিয়াও কোনো বিলম্ব হোৱা নাই, কিন্তু এয়া সোনকালে হোৱা উচিত । মই নীতিশ কুমাৰক কৈছোঁ যে একেলগে আৰু ঐক্যবদ্ধভাৱে যুঁজ দিয়ক, যাতে বিজেপিয়ে ইয়াৰ সুবিধা গ্ৰহণ কৰিব নোৱাৰে । মোদীয়ে ভাবিছে যে ইণ্ডিয়া মিত্ৰতা ভাঙিব । কিন্তু এয়া কেতিয়াও নহ'ব । কিয়নো এই মিত্ৰজোঁটৰ সকলো অংশীদাৰ অতি পৰিপক্ব ।" চিপিআইৰ ৰাষ্ট্ৰীয় সাধাৰণ সম্পাদক ডি ৰাজাই কয় ।
আনহাতে, নীতিশ কুমাৰক আহ্বায়ক বনোৱাৰ প্ৰশ্নত ডি ৰাজাই কয় যে তেওঁ এজন অতি অভিজ্ঞ নেতা । মিত্ৰজোঁটত মুৰব্বী আৰু শীৰ্ষ নেতা আছে । তেওঁলোকে জানে তেওঁলোকে কি ভূমিকা পালন কৰিব লাগিব । তেওঁলোকে জানে যে মোদীক পৰাস্ত কৰা আৰু দেশক ৰক্ষা কৰাত তেওঁলোকৰ ভূমিকা কি হ'ব ।
ইফালে বিহাৰত চিপিআইৰ দাবী সন্দৰ্ভত ডি ৰাজাই কয় যে বিহাৰৰ নেতাসকলে তেওঁলোকে কিমানখন আসনত প্ৰতিদ্বন্দ্বিতা কৰিব লাগিব সেয়া সিদ্ধান্ত ল'ব আৰু ইয়াক মিত্ৰতাৰ ওচৰত উপস্থাপন কৰিব । বিহাৰত কিমানখন আসনত প্ৰতিদ্বন্দ্বিতা কৰিব সেই সন্দৰ্ভত সমগ্ৰ সিদ্ধান্ত ৰাজ্যিক নেতৃত্বই ল'ব । তেওঁ ৰাষ্ট্ৰীয় পৰ্যায়ত ইণ্ডিয়াৰ মিত্ৰতা শক্তিশালী কৰিবলৈ নীতিশ কুমাৰক সাক্ষাৎ কৰিবলৈ আহিছে । তেওঁ কয় যে বিজেপিৰ লোকসকল উদ্বিগ্ন হৈ আছে । সেয়েহে তেওঁলোকে ইণ্ডিয়া মিত্ৰতাৰ ঐক্যক লৈ প্ৰশ্ন উত্থাপন কৰিছে ।
ইয়াৰ পূৰ্বে মঙলবাৰে দলীয় কাৰ্যালয় জনশক্তি ভৱনত সংবাদ মাধ্যমৰ সৈতে হোৱা বাৰ্তালাপৰ সময়ত ডি ৰাজাই কয় যে বিজেপি আৰু আৰএছএছৰ বিৰুদ্ধে ইণ্ডিয়া মিত্ৰতা গঠন কৰা হৈছে । আমাৰ লক্ষ্য হৈছে দেশক বিজেপি আৰু নৰেন্দ্ৰ মোদীৰ পৰা ৰক্ষা কৰা । বিগত বৈঠকত সিদ্ধান্ত লোৱা হৈছিল যে শীঘ্ৰেই আসন বিতৰণ কৰা উচিত । এতিয়া এইটো আৰম্ভ হৈছে আৰু বিহাৰতো আৰম্ভ হৈছে । উল্লেখ্য যে উপ-মুখ্যমন্ত্ৰী তেজস্বী যাদৱৰ সৈতেও তেওঁৰ ফোনযোগে বাৰ্তালাপ হয় । এক সৌহাৰ্দ্যপূৰ্ণ পৰিৱেশত আসন ভাগ-বটোৱাৰাৰ কথা চলি আছে ।
