নেশ্যনেল ডেস্ক,১২ জানুৱাৰী : লোকসভা নিৰ্বাচনৰ প্ৰাকক্ষণত বিৰোধী মিত্ৰজোঁট 'ইণ্ডিয়া'ৰ দলসমূহৰ আসন ভাগ-বটোৱাৰাক লৈ আলোচনা চলি আছে । কংগ্ৰেছৰ মিত্ৰজোঁট সমিতি আৰু আম আদমি পাৰ্টীৰ নেতাসকলে আসন ভাগ-বটোৱাৰা সন্দৰ্ভত শুকুৰবাৰে দ্বিতীয়বাৰৰ বাবে বৈঠকত মিলিত হ'ব । বৈঠকখন সন্ধিয়া ৬.৩০ বজাত কংগ্ৰেছ নেতা মুকুল ৱাছনিকৰ বাসগৃহত অনুষ্ঠিত হ'ব বুলি জানিব পৰা গৈছে । অন্তিমখন বৈঠকো নেতাগৰাকীৰ বাসগৃহতে অনুষ্ঠিত হৈছিল । আম আদমি পাৰ্টীৰ ৰাজ্যসভাৰ সাংসদ সন্দীপ পাঠক, দিল্লীৰ মন্ত্ৰী আতিশী আৰু সৌৰভ ভৰদ্বাজ বৈঠকত উপস্থিত থাকিব বুলি আশা কৰা হৈছে ।
বিৰোধী মিত্ৰজোঁটৰ বাবে লোকসভা নিৰ্বাচনৰ পূৰ্বে আসন ভাগ-বটোৱাৰা এক গুৰুত্বপূৰ্ণ বিষয় । এই সন্দৰ্ভত ১৪ আৰু ১৫ জানুৱাৰীত চূড়ান্ত সিদ্ধান্ত লোৱাৰ সম্ভাৱনা আছে । তাৰ পূৰ্বে, বিৰোধী দলবোৰৰ নেতাসকলে নিজৰ মাজতে আলোচনা কৰিব আৰু প্ৰস্তাৱটো উত্থাপন কৰিব । সূত্ৰৰ মতে শুকুৰবাৰে অৰ্থাৎ আজিৰ বৈঠকত আম আদমি পাৰ্টীয়ে আগবঢ়োৱা আসন ভাগ-বটোৱাৰাৰ প্ৰস্তাৱত দিল্লী আৰু হাৰিয়ানাত ৩ খনকৈ লোকসভা আসন, গুজৰাট আৰু গোৱাত এখনকৈ আসন আৰু আম আদমি পাৰ্টীয়ে পাঞ্জাবৰ বাবে ৬ খন আসনত প্ৰাৰ্থী দাবী কৰিব পাৰে । যিটো কংগ্ৰেছৰ মিত্ৰজোঁট সমিতিয়ে বিবেচনা কৰিব পাৰে ।
আনহাতে, আসন ভাগ-বটোৱাৰাৰ বিষয়ে কোনো সিদ্ধান্ত লোৱা হোৱা নাই যদিও আম আদমি পাৰ্টীৰ ৰাষ্ট্ৰীয় আহ্বায়ক তথা দিল্লীৰ মুখ্যমন্ত্ৰী অৰবিন্দ কেজৰিৱালে গুজৰাট আৰু গোৱা ভ্ৰমণ কৰি নিৰ্বাচনৰ প্ৰস্তুতি আৰম্ভ কৰিছে । দেওবাৰে গুজৰাটত এখন ৰাজহুৱা সভাত ভাষণ দি কেজৰিৱালে ভাৰুচ লোকসভা আসনৰ পৰা দলৰ প্ৰাৰ্থী হিচাপে চৈতৰ ভাছাভাৰ নাম ঘোষণা কৰে ।
উল্লেখ্য যে লোকসভা নিৰ্বাচন বিভিন্ন ধৰণে আম আদমি পাৰ্টীৰ বাবে গুৰুত্বপূৰ্ণ । ৰাষ্ট্ৰীয় দল হোৱাৰ পিচত আম আদমি পাৰ্টীয়ে ৰাষ্ট্ৰীয় সম্প্ৰসাৰণৰ সম্ভাৱনা অন্বেষণ কৰি আছে । ৫ খন ৰাজ্যত অনুষ্ঠিত বিধানসভা নিৰ্বাচনত আম আদমি পাৰ্টীৰ প্ৰদৰ্শন ভাল নাছিল । গতিকে এতিয়া লোকসভা নিৰ্বাচনত পুনৰ প্ৰত্যাৱৰ্তন কৰাটো আপৰ বাবে এক প্ৰত্যাহ্বানৰ দৰে । দিল্লী, পাঞ্জাব, গুজৰাট, গোৱা আৰু হাৰিয়ানাত আপে দলৰ প্ৰদৰ্শন উন্নত হ'ব বুলি আশা কৰিছে । এইবাৰ আম আদমি পাৰ্টীয়ে আসন লাভ কৰি একাউণ্ট খুলিব বুলি আশা কৰা হৈছে ।
লগতে পঢ়ক :লোকসভা নিৰ্বাচনৰ পূৰ্বে আগ্ৰাসী ভংগীত কংগ্ৰেছ; সকলো সমন্বয়কক দিল্লীলৈ তলৱ
