পশ্চিমবংগ, ৫ মে': বহিঃৰাজ্যৰ আৱদ্ধ হৈ থকা লোক সকলক নিজৰ-নিজৰ স্থানলৈ পঠিওৱাৰ ব্যৱস্থা কৰিবলৈ সোমবাৰে পশ্চিমবংগ চৰকাৰে মুকলি কৰিলে এটা এপ্ । সোমবাৰে ৰাজ্যখনৰ গৃহ সচিব আলপান বন্দোপাধ্যায়ে জানিবলৈ দিয়ে এই কথা । আৱদ্ধ হৈ থকা লোক সকলৰ সহায়ক হোৱাকৈয়ে এই এপ্ মুকলি কৰা হৈছে পশ্চিমবংগ চৰকাৰৰ তৰফৰ পৰা ।
এই এপ্ মুকলি কৰিয়ে গৃহ সচিবগৰাকীয়ে কয়, লক্ ডাউনৰ ঘোষণা হোৱাৰ পাচৰে পৰা বৃহৎ সংখ্যক বহিঃৰাজ্যৰ লোক আৱদ্ধ হৈ আছে পশ্চিমবংগত । যাৰ বাবে এই এপ্ মুকলি কৰা হৈছে । আৱদ্ধ লোক সকলক এই এপ্ ৰ যোগেদি অনলাইন অনুমতি প্ৰদান কৰা হ'ব পশ্চিমবংগ ত্যাগ কৰাৰ ।
বন্দোপাধ্যায়ে লগতে কয়, এই এপ্ ৰাজ্য চৰকাৰৰ ইগিয়ে বাংলা (Egiye Bangla) ৱেবচাইটত গৈ ডাউনল'ড কৰিবলৈ পাৰিব আবেদনকাৰীয়ে । নিজৰ জন্মভূমি ৰাজ্যলৈ উভতি যাবৰ বাবে ইচ্ছুক লোক সকলে এই এগজিট এপ্ ৰ সহায়েৰে অনলাইন আবেদন কৰিব পাৰিব । এইটো এপ্ চলাবলৈ অতি সহজ বুলিও উল্লেখ কৰে ।
লগতে সকলো ওচৰ-চুবুৰীয়া ৰাজ্যৰ নডাল বিষয়াক অনুৰোধ কৰিছে যে, এই লোক সকলক মূল স্থানলৈ নিয়াৰ বাবে প্ৰৱেশ ব্যৱস্থা অতি সহজ কৰিবলৈ ।
