নিউজ ডেস্ক,১৬ আগষ্ট: দেওবাৰে দুপৰীয়া হোৱা ভূমিস্খলনৰ ফলত চমেলি জিলাৰ গৌচৰৰ সমীপত ৭ নং ৰাষ্ট্ৰীয় ঘাইপথটো আবদ্ধ হৈ পৰা পৰিলক্ষিত হয় । ফলত ঘাইপথটোৰে চলাচল কৰি থকা যান বাহন সমূহে অসুবিধাৰ সন্মুখীন হ'ব লগা হৈছে । অৱশ্যে ভূমিস্খলনত কোনো লোক হতাহত হোৱাৰ খবৰ পোৱা নাই ।
ভূমিস্খলনৰ ফলত আবদ্ধ হৈ পৰা ৰাষ্ট্ৰীয় ঘাইপথটোৰ বদ্ৰীনাথ হাইৱে, কৰ্ণপ্ৰয়াগ, বলডোদা আৰু লাম্বগড়ত পথচোৱা মুকলি কৰিবৰ বাবে ইতিমধ্যে কাম আৰম্ভ কৰা হৈছে । বিৰতিৰ অন্তৰে অন্তৰে হৈ থকা বৰষুণৰ ফলত হোৱা ভূমিস্খলনে স্থানীয় লোকসকলৰ জীৱনলৈকো কঢ়িয়াই আনিছে ভাবুকি । বৰষুণৰ ফলত পাহাৰ খহি হোৱা ভূমিস্খলনে বদ্ৰীনাথ ৰাজমাৰ্গটো পুতি পেলোৱাৰ ফলত স্তব্ধ হৈ পৰিছে ঘাইপথটো ।
চমেলিৰ জিলা উপায়ুক্ত স্বাতী এচ ভদোৰিয়াই জানিব দিয়া মতে, হৈ থকা নেৰেনেপেৰা বৰষুণৰ ফলত হোৱা ভূমিস্খলনৰ বাবে জিলাখনৰ বহুকেইটা পথ বন্ধ হৈ পৰিছে ।
উল্লেখ্য যে, উত্তৰাখণ্ডৰ বহুকেইটা অঞ্চলত হৈ থকা নেৰানেপেৰা বৰষুণৰ ফলত সাধাৰণ জনজীৱন ব্যাঘাট হোৱাৰ লগতে নদীসমূহৰ জলস্তৰ বৃদ্ধিৰ সমান্তৰালকৈ হোৱা ভূমিস্খলনে অধিক ভাবুকি কঢ়িয়াই আনিছে ।
