নিউজ ডেস্ক, 2 নবেম্বৰঃ কংগ্ৰেছৰ অন্তৰ্ৱৰ্তীকালীন সভানেত্ৰী ছোনিয়া গান্ধীয়ে আঞ্চলিক অৰ্থনৈতিক সহযোগিতা সংস্থা(RCEP)চুক্তিৰ বাবে মোডী চৰকাৰক তীব্ৰ ভাষাৰে সমালোচনা কৰে ৷ ছোনিয়া গান্ধীয়ে মন্তব্য কৰে যে এই চুক্তিখনে কৃষক, ব্যৱসায়ী, সৰু আৰু মধ্যম উদ্যোগৰ বাবে অধিক জটিলতা কঢ়িয়াই আনিব ৷ তেঁও লগতে কয় যে চৰকাৰৰ এই সিদ্ধান্তৰ ফলত 9 মিলিয়ন চাকৰিৰ লোকচান হ’ব ৷
কংগ্ৰেছৰ অন্তৰ্ৱৰ্তীকালীন সভানেত্ৰীগৰাকীয়ে নৰেন্দ্ৰ মোডীক কটাক্ষ কৰি কয় যে, অৰ্থনৈতিক মণ্ডাৱস্থাত অৰ্থনীতিৰ উন্নতিৰ বাবে কোনো উল্লেখযোগ্য সিদ্ধান্ত ন'লৈ মোডীয়ে সংবাদ মাধ্যমৰ শিৰোনাম বুটলাত অধিক ব্যস্ত হৈ আছে ৷ তেঁও কয় যে এজন দায়িত্বশীল নাগৰিক হোৱাৰ বাবে তেঁও ভাৰতীয় অৰ্থনীতিৰ এই অৱস্থা সহ্য কৰিব পৰা নাই আৰু তেঁও এই শোচনীয় অৱস্থা দেখি দুখিত ৷ কিন্তু ইয়াতকৈও অধিক দুখজনক কথা এই যে চৰকাৰে সকলো জানিও চকু মুদা কুলিৰ ভাঁও ধৰি আছে ৷
