নেশ্য়নেল ডেস্ক , ২৯ ডিচেম্বৰ: আপুনি অনলাইন ডেটিং এপ্লিকেচন ব্য়ৱহাৰ কৰে নেকি ? যদি কৰে সাৱধান হওক । ডেটিং এপ্লিকেচন ব্য়ৱহাৰ কৰিয়ে সাংঘাতিক বিপদৰ সন্মুখীন হৈছে পুণেৰ এগৰাকী যুৱতী । অনলাইন ডেটিং এপ্লিকেচনৰ মাধ্য়মেৰে চিনাকী হোৱা এজন যুৱকে মহাৰাষ্ট্ৰৰ পুণেত ধৰ্ষণ কৰে ২৬ বছৰীয়া এগৰাকী যুৱতীক । ভুক্তভোগী যুৱতী গৰাকী পিমপ্ৰি চিমচৱাদ অঞ্চলৰ আৰু পেছাত এগৰাকী এয়াৰ হোষ্টেছ ।
অভিযোগ অনুসৰি, যোৱা ২৬ ডিচেম্বৰত যুৱতীগৰাকীক শাৰীৰিকভাৱে অপদস্থ কৰাৰ লগতে ধৰ্ষণ কৰে যুৱকজনে । এই ঘটনাৰ পাছতে ৱাকড আৰক্ষী থানাত দিয়া এক এজাহাৰৰ ভিত্তিত আৰক্ষীয়ে গ্ৰেপ্তাৰ কৰে ২৮ বছৰীয়া যুৱকজনক । এজাহাৰ অনুসৰি, দুয়োজনে এটা অনলাইন ডেটিং এপ্লিকেচনৰ মাধ্য়মেৰে চিনাকী হৈছিল আৰু ব্য়ক্তিগতভাৱে সাক্ষাৎ কৰাৰ সিদ্ধান্ত লৈছিল । যাৰ পৰিপ্ৰেক্ষিতত দুয়োজনে নিশাৰ আহাৰ গ্ৰহণ কৰিবলৈ বাহিৰলৈ গৈছিল ।
অভিযোগ অনুসৰি যুৱকজনে যুৱতীগৰাকীক সুৰাপান কৰিবলৈ জোৰ কৰিছিল আৰু তাইৰ ঘৰলৈ লৈ যোৱাৰ পৰিৱৰ্তে যুৱকজনে নিজৰ ঘৰলৈ লৈ গৈ শাৰীৰিকভাৱে অপদস্থ কৰাৰ লগতে ধৰ্ষণ কৰে । এই ঘটনাত যুৱতী গৰাকী আঘাতপ্ৰাপ্ত হয় আৰু ওচৰৰে এখন হাস্পতালত ভৰ্তি কৰা হয় । উল্লেখ্য যে আৰক্ষীয়ে ইতিমধ্য়ে ভাৰতীয় দণ্ডবিধিৰ কেইবাটাও ধাৰাত ৰুজু কৰা গোচৰ সন্দৰ্ভত তদন্ত অব্য়াহত ৰাখিছে ।
