নেশ্যনেল ডেস্ক,7 ডিচেম্বৰঃ উত্তৰ প্ৰদেশৰ কৃষকসকলক কুঁহিয়াৰৰ বাবে মূল্য পৰিশোধ নকৰা বাবে বিজেপি চৰকাৰৰ বিৰুদ্ধে সৰৱ হৈ পৰে কংগ্ৰেছৰ সাধাৰণ সম্পাদক প্ৰিয়ংকা গান্ধী ভদ্ৰাই ৷
তেখেতে টুইটযোগে কয়, "সংদৰ ভিতৰচ’ৰা নিৰ্মানৰ বাবে বিজেপি চৰকাৰৰ হাতত 20,000 কোটি টকা আছে, প্ৰধানমন্ত্ৰীৰ বাবে বিশেষ বিমান ক্ৰয়ৰ বাবে 16,000 কোটি টকা আছে ৷ কিন্তু উত্তৰ প্ৰদেশৰ কৃষকসকলক কুঁহিয়াৰৰ বাবে উচিত মূল্য দিবলৈ 14,000 কোটি টকাৰ অভাৱ ৷ 2017 চনৰ পৰা কুঁহিয়াৰৰ মূল্য বৃদ্ধিৰ ব্যৱস্থা কৰা হোৱা নাই ৷ শাসকীয় চৰকাৰখনে কেৱল কোটিপতিসকলৰ কথাহে চিন্তা কৰে ৷"
সমান্তৰালকৈ, প্ৰধানমন্ত্ৰী নৰেন্দ্ৰ মোডীয়ে নিম্নতম সমৰ্থন মূল্য ব্যৱস্থা ধ্বংস কৰি কৃষকসকলক দুৰ্বল কৰাৰ চেষ্টা কৰা বুলি অভিযোগ উত্থাপন কৰিছে কংগ্ৰেছে ৷ প্ৰধানমন্ত্ৰীৰ প্ৰতিটো সিদ্ধান্তই পুঁজিপতিসকলৰ লাভৰ বাবে ৷ কৃষকসকলে চৰকাৰৰ এই ষড়যন্ত্ৰ ভালদৰে উপলব্ধি কৰিছে বুলি মন্তব্য কৰে বিৰোধী দলটোৱে ৷
