পুঞ্চ,2 জানুৱাৰী: পাকিস্তানৰ 14 বছৰীয়া যুৱক আলী হাইদৰে ভুলক্ৰমে ভাৰতত প্ৰৱেশ কৰি বন্দী হৈছিল সীমান্তৰ সুৰক্ষাত নিয়োজিত কৰ্মীৰ হাতত ৷ সম্প্ৰতি পুঞ্চত আছে যুৱকগৰাকী ৷ পুঞ্চ আৰক্ষীৰ এগৰাকী জ্যেষ্ঠ আৰক্ষী বিষয়া ৰমেশ অংগৰালে এই সন্দৰ্ভত কয় যে, পু়্ঞ্চ জিলাত জম্মু-কাশ্মীৰ আৰক্ষীৰ বিশেষ অভিযানকাৰী দলে বৃহস্পতিবাৰে নিশা অজোত গাঁৱৰ সমীপৰ বতৰনালেত কৰায়ত্ত কৰে যুৱকজনক ৷ ধৃত যুৱক আলী হাইদৰ পাক অধিকৃত কাশ্মীৰৰ মীৰপুৰৰ বাসিন্দা ৷
বহু সোধ-পোছৰ অন্তত যুৱকজন ভুলক্ৰমে ভাৰতত প্ৰৱেশ কৰাতো প্ৰমাণিত হৈ পৰে ৷ সেয়ে শীঘ্ৰে পাকিস্তানলৈ ঘূৰাই পঠিওৱা হ’ব যুৱকজনক ৷ এই সন্দৰ্ভত পাকিস্তান আৰক্ষীৰ শীৰ্ষ সূত্ৰৰ সৈতে যোগাযোগ কৰা হৈছে ৷
আলীয়ে জম্মু-কাশ্মীৰ আৰক্ষীৰ লগতে ভাৰতীয় সৈন্যক কৃতজ্ঞতা জ্ঞাপন কৰে ৷ আলীয়ে ভুলক্ৰমে ভাৰতৰ সীমাত প্ৰৱেশ কৰাৰ কথা স্বীকাৰ কৰে ৷ কাপোৰ, খাদ্য আৰু জোতা প্ৰদান কৰি আৰক্ষী আৰু সৈন্যসকলে মহানুভৱতাৰ পৰিচয় দিছে ৷ লগতে শীঘ্ৰে ঘৰলৈ পঠিয়াবলৈ আলীয়ে অনুৰোধ জনাইছে আৰক্ষী আৰু সেনাবাহিনীক ৷
লগতে চাওকঃ আজি দেশত ক’ভিড প্ৰতিষেধকৰ দ্বিতীয় পৰ্যায়ৰ ড্ৰাই ৰান
