নেশ্যনেল ডেস্ক, 30 মাৰ্চ : দেশত কোভিড-19 ৰ প্ৰতিৰোধৰ বাবে কেন্দ্ৰীয় তথা ৰাজ্য চৰকাৰে গ্ৰহণ কৰি আহিছে বিভিন্ন ব্যৱস্থা ৷ স্বাস্থ্য় মন্ত্ৰণালয়ে এই সম্পৰ্কত কিছু নিৰ্দেশাৱলী প্ৰদান কৰাৰ লগতে কোভিড-19 ৰ সৈতে জড়িত স্বাস্থ্য কৰ্মীসকলৰ বাবে জাৰি কৰিছে কিছুমান নিৰ্ধাৰিত সঞ্চালন প্ৰক্ৰিয়াৰ (standard operating procedure) ৷
এই SOP অনুসৰি সকলো সন্দেহযুক্ত লোকক আইচ'লেছন ৱাৰ্ডত ৰখাৰ লগতে গুৰুতৰ ঘটনাসমূহৰ ওপৰত তীক্ষ্ন দৃষ্টি ৰখা উচিত ৷ ইয়াৰোপৰি, ৰোগী কঢ়িওৱা এম্বুলেন্সসমূহো পৰিস্কাৰ-পৰিচ্ছন্ন কৰি ৰাখিবলৈ নিৰ্দেশ প্ৰদান কৰিছে ৷ মুৰব্বী চিকিৎসা বিষয়াৰ (CMO/CS) দ্বাৰা নিয়োজিত স্বাস্থ্য কৰ্মীয়েহে এই দায়িত্ব পালন কৰিব ৷
ইয়াৰোপৰি, টেলিফোনিক সেৱাৰ জৰিয়তে ৰোগীৰ পৰা ফোনকল লাভ কৰাৰ পাচত সেই সম্পৰ্কত গ্ৰহণ কৰিবলগা ব্যৱস্থা সম্পৰ্কেও জাননী জাৰি কৰা হয় ৷
এই নিৰ্দেশনা অনুসৰি, 102 এম্বুলেন্স যিহেতু গৰ্ভৱতী মহিলা আৰু ৰোগাক্ৰান্ত শিশুৰ বাবেহে ব্যৱহাৰ কৰা হয় সেয়েহে এই এম্বুলেন্সত কৰ'ণা ৰোগী অনা উচিত নহয় ৷
ইয়াৰোপৰি, জৰুৰীকালিন স্বাস্থ্য বিভাগৰ কৰ্মী (Emergency Medical Technicians) আৰু এম্বুলেন্স চালকসকলে যাতায়তৰ সময়ত ব্যক্তিগত সুৰক্ষা সঁজুলি (Personal Protective Equipment) পৰিধান কৰিব লাগিব ৷
ইয়াৰোপৰি, ৰোগী আৰু ৰোগীৰ পৰিয়ালক প্ৰদান কৰা হব তিনি তৰপীয়া মাস্ক আৰু গ্লোভছ ৷ হাত ধুৱা আৰু শ্বাস-প্ৰশ্বাসজনত শিষ্টাচাৰ সকলোৱে শিকা উচিত বুলিও নিৰ্দেশনাত প্ৰকাশ ৷
টেলিফোনিক সেৱাৰে ফোনকল লাভ কৰাৰ পাচত স্বাস্থ্যকৰ্মীসকলে পৰিস্থিতিটো বুজিবলৈ চেষ্টা কৰাৰ লগতে ছুপাৰভাইজাৰৰ নিৰ্দেশ অনুসৰি দায়িত্ব পালন কৰা উচিত ৷
ইয়াৰোপৰি, স্বাস্থ্যকৰ্মীৰ কৰ্মৰ সাপ্তাহিক পৰ্যালোচনাও কৰিব মুৰব্বী চিকিৎসা বিষয়াই ৷
আৰু পঢ়ক : বিশ্বব্যাপী Covid 19
