মুম্বাই, 26 নৱেম্বৰঃ বহু প্ৰত্যাশিত মহাৰাষ্ট্ৰ নতুন ৰাজ্য চৰকাৰ গঠনৰ ক্ষেত্ৰত দেখা দিয়া সাংবিধানিক অচলাৱস্থাৰ অন্ত পৰাটো নিশ্চিত হৈছে ৷ 23 নৱেম্বৰৰ পুৱা আকস্মিকভাৱে ৰাজ্যপালৰ আমন্ত্ৰণমৰ্মে দেৱেন্দ্ৰ ফাড়নাবিচ আৰু এন চি পি নেতা অজিত পাৱাৰে ক্ৰমে মুখ্যমন্ত্ৰী আৰু উপ-মুখ্যমন্ত্ৰী হিচাপে শপত গ্ৰহণ কৰা 3 দিন অতিক্ৰম নহওতেই মঙলবাৰে সংখ্যাগৰিষ্ঠতাৰ অভাৱত নিজ নিজ পদৰ পৰা নেতাদ্বয়ে পদত্যাগ কৰে ৷ ইফালে কংগ্ৰেছ-এনচিপি-শিৱসেনাই দাখিল কৰা এক লেখ আবেদনৰ শুনানি গ্ৰহণ কৰি উচ্চতম ন্যায়ালয়ে ফাড়নাবিচ আৰু অজিত পাৱাৰক বুধবাৰৰ ভিতৰত সংখ্যাগৰিষ্ঠতা প্ৰমাণৰ নিৰ্দেশ জাৰি কৰিছিল ৷ অৱশ্যে নিৰ্দিষ্ট ধাৰ্য কৰা সময়ৰ পূৰ্বেই সংখ্যাৰ খেলত আসন্ন পৰাজয়ৰ কথা অনুমান কৰি মঙলবাৰে পদত্যাগ কৰে নেতাদ্বয়ে ৷
ইফালে নৱগঠিত শিৱসেনা-কংগ্ৰেছ-এন চি পি মিত্ৰজোঁট অৰ্থাৎ 'মহা বিকাশ আগহাধী'য়ে 1 ডিচেম্বৰত সদনত সংখ্যাগৰিষ্ঠতা প্ৰদৰ্শন কৰিব বুলি মন্তব্য কৰে এন চি পিৰ মুৰব্বী শাৰদ পাৱাৰে ৷ নেতাগৰাকীয়ে লগতে কয়,"মহা বিকাশ আগহাধী" মিত্ৰজোঁটৰ তিনিগৰাকী প্ৰতিনিধিয়ে আজি ৰাজ্যপালক সাক্ষাৎ কৰে ৷ তিনিও দলৰ সিদ্ধান্ত মৰ্মে অহা 1 ডিচেম্বৰত মুম্বাইৰ শিৱাজী পাৰ্কত শপত গ্ৰহণ সমাৰোহ অনুষ্ঠিত হ'ব ৷"
মুম্বাইৰ এখন বহুতাৰকাযুক্ত হোটেলত মিত্ৰজোঁটৰ সদস্যসকলৰ সৰ্বসন্মতিমৰ্মে শিৱসেনাৰ উদ্বৱ থাকৰেক "মহা বিকাশ আগহাধী"ৰ মুখ্যমন্ত্ৰী পদৰ প্ৰাৰ্থীৰূপে নিৰ্বাচিত কৰা হয় ৷ আনহাতে কংগ্ৰেছ নেতা বালাচাহেব থাৰোতক বিধায়িনী দলৰ দলপতি হিচাপে নিৰ্বাচন কৰা হয় ৷
মুন্বাইত এক গণ সমাৱেশক সম্বোধন কৰি শিৱসেনা প্ৰধান উদ্বৱ থাকৰেই কয়,"মই কোনোদিনেই এই ৰাজ্যৰ নেতৃত্ব বহন কৰিম বুলি সপোন দেখা নাছিলো ৷ এই আপাহতে মই শ্ৰীমতী ছোনিয়া গান্ধীৰ লগতে বাকী সকলোকে ধন্যবাদ জ্ঞাপন কৰিছো ৷ আমি দেশক আমাৰ মাজত এক পাৰস্পৰিক বিশ্বাসেৰে এক নতুন দিশ প্ৰদান কৰিবলৈ সক্ষম হম ৷"
আৰু পঢ়ক মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নাভিজৰ পদত্যাগ
