ডেৰা বাবা নানক,11 নৱেম্বৰঃ সমগ্ৰ ভাৰতীয় উপমহাদেশ সাক্ষী হ'ল এক বিৰল ঐতিহাসিক ক্ষণৰ ৷ অব্যাহত সকলোধৰণৰ ৰাজনৈতিক তিক্ততা আৰু ৰক্তপাতক একাষৰীয়া কৰি ভাৰত আৰু পাকিস্তানে বাস্তৱ ৰূপ দিবলৈ সক্ষম হৈছে এনে এক সপোন আৰু লক্ষ্যৰ ৷ যি বিগত কেইবা দশক ধৰি অপূৰ্ণ হৈ পৰি আছিল ৷ গৰিষ্ঠ সংখ্যক ভক্তপ্ৰাণ ৰাইজৰ, বিশেষকৈ শিখ ধৰ্মাৱলম্বীসকলৰ অন্যতম আকাঙ্খা তথা প্ৰাণকেন্দ্ৰ কাৰ্টাৰপুৰ কৰিডৰ ৷
শনিবাৰে পুৱা প্ৰধানমন্ত্ৰী নৰেন্দ্ৰ মোডীয়ে কাৰ্টাৰপুৰ কৰিডৰলৈ যোৱা ডেৰা বাবা নানকত অৱস্থিত পেচেঞ্জাৰ টাৰ্মিনেল বিল্ডিং আৰু সংযুক্ত সুৰক্ষা চকীটো উদ্বোধন কৰে ৷
উক্ত পথটোৱেই হৈছে পাকিস্তানৰ নৰোৱাল জিলাত অৱস্থিত ঐতিহ্যমণ্ডিত ডেৰা দৰবাৰ চাহিবলৈ যাবলগীয়া পথ ৷
বহু বছৰৰ প্ৰতীক্ষাৰ অন্তত শিখ সম্প্ৰদায়ৰ লগতে অন্যান্য ভক্ত তথা অনুগামীসকলৰ স্বপ্নক বাস্তৱ ৰূপ দিয়াত সহায়-সহযোগিতা আগবঢ়োৱাৰ বাবে প্ৰধানমন্ত্ৰী মোডীয়ে পাক প্ৰধানমন্ত্ৰী ইমৰাণ খানক ধন্যবাদ জ্ঞাপন কৰিছে ৷
তাৎপৰ্যপূৰ্ণভাৱে প্ৰধানমন্ত্ৰীগৰাকীয়ে উক্ত দিনটোতেই সম্পন্ন হোৱা ঐতিহাসিক অযোধ্যা গোচৰৰ চূড়ান্ত ৰায়দান সন্দৰ্ভত কোনো মন্তব্য কৰাৰ পৰা বিৰত থাকে ৷
কিন্তু নিজ বক্তব্যত প্ৰধানমন্ত্ৰীয়ে শিখ ধৰ্মগুৰু গুৰুনানকৰ দৰ্শন আৰু শিক্ষাৰ লগতে মানৱ সমাজলৈ গুৰুজনাৰ প্ৰেম, শান্তি আৰু সাম্প্ৰদায়িক সম্প্ৰীতিৰ বাৰ্তাৰ বিষয়ে উল্লেখ কৰে ৷
পাকিস্তানৰ দৰবাৰ চাহিব অভিমুখে ৰাওনা হোৱা ভাৰতীয় প্ৰতিনিধি দলত আছিল- পঞ্জাৱৰ মুখ্যমন্ত্ৰী কেপ্তেইন অমৰিন্দৰ সিং, কেন্দ্ৰীয় মন্ত্ৰী হৰদীপ পুৰী, সৰছিমৰৎ বাদল, লোকসভাৰ সাংসদমণ্ডলী তাৰ ভিতৰত আছে চানী দেউল, অন্যান্য সন্মানীয় ব্যক্তিসকল ৷ উক্ত পৰিকল্পনাক বাস্তৱ ৰূপ দিয়াত অগ্ৰণী ভূমিকা পালন কৰা নৱজোৎ সিং সিদ্ধুও এই প্ৰতিনিধি মণ্ডলৰ সদস্য হিচাবে আছিল ৷ উল্লেখ্য যে, পাক প্ৰধানমন্ত্ৰী ইমৰাণ খানৰ একমাত্ৰ নিমন্ত্ৰিত ভাৰতীয় অতিথি হিচাবেও পাকিস্তান ভ্ৰমণ কৰিছিল সিদ্ধুৱে ৷
আনহাতে প্ৰতিনিধিমণ্ডলত অংশগ্ৰহণ কৰিব নোৱাৰাসকলৰ ভিতৰত আছিল 100 ৰো অধিক প্ৰৱাসী শিখ সম্প্ৰদায়ৰ লোক ৷ তেওঁলোকৰ ভিতৰৰ অন্যতম এগৰাকী হৈছে খালিস্তানী বিদ্ৰোহক সমৰ্থন জনোৱাৰ অপৰাধত প্ৰায় তিনিদশক ধৰি নিষেধাজ্ঞাৰ সন্মুখীন হোৱা প্ৰৱাসী ভাৰতীয় শিখ ৷ তেখেতৰ ওপৰত ভাৰত চৰকাৰে কাৰ্টাৰপুৰৰ উদ্বোধনী অনুষ্ঠানত অংশ ল'ব নোৱাৰাকৈ ছেপ্টেম্বৰত নিষেধাজ্ঞা আৰোপ কৰিছিল ৷
যদিও ভাৰতীয় প্ৰতিনিধিমণ্ডলত শতাধিকে অংশগ্ৰহণ কৰিব পৰা নাই ৷ তেওঁলোকে ডেৰা বাবা চাহিবৰ জিৰ পইণ্টৰ পৰা থিয় হৈ যথেষ্ট আশাবাদী যেন পৰিলক্ষিত হৈছে ৷ কিয়নো অনাগত দিনত তেওঁলোকেও দৰবাৰ চাহিবলৈ ভ্ৰমণ কৰিব পাৰিব ৷
কিন্তু বহুসংখ্যক লোক যথেষ্ট দৰিদ্ৰ আৰু এইক্ষেত্ৰত তেওঁলোকে ভাবিবলৈ বাধ্য হৈ পৰিছে যে, পাকিস্তানে ধাৰ্য কৰা 20 ডলাৰ বা 1200-1400 টকা মুঠেই কম পৰিমাণ নহয় ৷ তাৰোপৰি ৰেল যাত্ৰা বা বাছ যাত্ৰাৰ সৈতে উপস্থিত হ'বলৈ ই যথেষ্ট ব্যয়বহুল হোৱা পৰিলক্ষিত হৈছে ৷ ভাৰতীয় পক্ষৰ তৰফৰ পৰা কৰিডৰস্থলীত ষ্টেণ্ড তৈয়াৰ কৰা হৈছে ৷ তাৰোপৰি অন্যান্য কিছু বিষয়ক লৈ তীব্ৰ প্ৰতিক্ৰিয়াৰ সৃষ্টি হৈছে ৷ কাৰণ যাত্ৰাৰ বাবে পাছপৰ্ট হৈছে অত্যাৱশ্যকীয় নথি ৷ এইক্ষেত্ৰত সমস্যাৰ সন্মুখীন হৈছে দৰিদ্ৰ লোকসকল ৷ কিয়নো সৰহসংখ্যকৰেই নাই পাছপৰ্ট ৷ লোকসকলে পাছপৰ্টৰ পৰিৱৰ্তে যিকোনো পৰিচয়-পত্ৰ বা আধাৰ কাৰ্ডৰ পোষকতা কৰিছে ৷
যি কি নহওক গুৰুনানক দেৱৰ 550 তম জন্মজয়ন্তী উপলক্ষে এই কৰিডৰটোৰ শুভাৰম্ভণি ঘটোৱা হৈছে ৷ সকলোৱে এতিয়া মুকলি কৰা এই আস্থাৰ কৰিডৰটো ভাৰত-পাকিস্তানৰ মাজত মৈত্ৰী আৰু বন্ধুত্বৰ কৰিডৰ হিচাপে প্ৰতিষ্ঠা লাভ কৰিব বুলি আশা ব্যক্ত কৰিছে ৷
কাৰ্টাৰপুৰ কৰিডৰ পৰিদৰ্শনত ভাৰতীয় প্ৰতিনিধি দলত অংশগ্ৰহণকাৰীসকলে বিভিন্ন ধৰণে নিজৰ অভিমত ব্যক্ত কৰিছে ৷ তাৰ ভিতৰত-
পি এচ আই ডি চিৰ অধ্যক্ষ কৃষ্ণ কুমাৰ বাৱাই কয়,"আজি মই কাৰ্টাৰপুৰ কৰিডৰলৈ যোৱা ভাৰতীয় প্ৰতিনিধিমণ্ডলত অংশগ্ৰহণ কৰিলো ৷ এয়াই আমাৰ সকলোৰে লগতে সমগ্ৰ দেশৰ বাবে এক সুখৰ ক্ষণ ৷ ইয়াৰোপৰি ই প্ৰতিজন ধৰ্মপ্ৰাণ শিখৰ বাবে সুখৰ সময় ৷ ইয়াৰ বাবে মই সকলোকে ধন্যবাদ জ্ঞাপন কৰিছো ৷"
কংগ্ৰেছ বিধায়ক ৰাণা গুৰজিৎ সিঙেও নিজৰ অভিজ্ঞতা ব্যক্ত কৰি কয়, "এয়া মোৰ বাবে দ্বিতীয়বাৰ গুৰুধাম যাত্ৰা ৷ এইবাৰ খোজকাঢ়ি যাব পৰাটো মোৰ বাবে এক অনন্য সুযোগ তথা অবিস্মৰণীয় অভিজ্ঞতা ৷"
আনহাতে শিৰোমণি আকালি দলৰ সাংসদ চান্দু মাজৰাই নিজৰ অভিমত ব্যক্ত কৰি কয় "আজি মোৰ জীৱনৰ বাবে এক অতি সুখৰ দিন ৷ এইয়া এক ঐতিহাসিক মুহূৰ্ত বুলি মই ক'ব পাৰো ৷ আজি এনে লাগিছিল যেন সীমান্তত যেনেদৰে তেজবোৰ উত্তপ্ত হৈ পৰে আৰু বিবাদ-সংঘাতৰ পৰিৱেশ অব্যাহত আছে, তাৰ পৰিৱৰ্তে আজিৰ যি পৰিৱেশ আছিল ই এক সম্পূৰ্ণ বিপৰীত পৰিৱেশৰ সূচনা কৰিছে ৷ দুয়ো দেশৰ চৰকাৰে সকলোৰে হিত তথা মানৱতাৰ কল্যাণৰ অৰ্থে, শান্তিৰ তত্বৰ ওপৰত নৈতিকভাৱে কাম কৰিলে আমাৰ সকলো দ্বন্দ আৰু বিবাদ শেষ কৰিব পৰা যাব ৷"
সকলো ৰাজনৈতিক বিষয় যেনে এই কৰিডৰক পাকিস্তানে ভাৰত বিৰোধী কাৰ্যকলাপৰ এক অংশ বুলি গ্ৰহণ কৰা বিভিন্ন প্ৰচাৰৰ সংশয়ক একাষৰীয়া কৰি সকলোৱে এজনে আনজনক শুভেচ্ছা জ্ঞাপন কৰা দেখা গৈছে ৷ পুৰুষ, মহিলা,ডেকা, বৃদ্ধ, শিশু সকলো উৎসৱমুখৰ হৈ পৰাৰ লগতে ভক্তিৰ অদম্য এনাজৰীৰে উদ্বুদ্ধ হৈ পৰিছে ৷
আৰু পঢ়ক প্ৰধানমন্ত্ৰী নৰেন্দ্ৰ মোডীয়ে মুকলি কৰিলে কৰ্টাৰপুৰ ক'ৰিডৰ
