নেশ্যনেল ডেক্স,25 মেঃ কেৰালাৰ আঞ্চলত সৰ্প দংশনত মৃত্যু হোৱা মহিলাৰ মৃত্যুৰ তদন্তত পোহৰলৈ আহে ভয়ংকৰ তথ্য । অপৰাধ শাখাই চলোৱা অনুসন্ধানত পোহৰলৈ আহে যে, এইয়া দুৰ্ঘটনা নহয়, এক পৰিকল্পিত হত্যাকাণ্ডহে । মহিলাগৰাকীক হত্যা কৰাৰ বাবে স্বামীয়ে আনিছিল সাপ ।
25 বৰ্ষীয় উথৰাৰ মৃত্যুৰ পিছতে অপৰাধ শাখাই আৰম্ভ কৰে তদন্ত । ইয়াৰ পিছতেই তেখেতৰ স্বামী সুৰয আৰু এজন বন্ধুক আৰক্ষীয়ে দেওবাৰে আটক কৰি জেৰা অব্যাহত ৰাখে । আৰক্ষীৰ জেৰাত মহিলাগৰাকীক পৰিকল্পিতভাৱে হত্যা কৰা বুলি স্বীকাৰ কৰে স্বামীয়ে । কোল্লম গ্ৰাম্যৰ আৰক্ষী অধীক্ষক হৰিশংকৰে প্ৰকাশ কৰে এই কথা ।
আৰক্ষীয়ে জনোৱা অনুসৰি 6 মে'ৰ নিশা এই ঘটনা সংঘটিত হয় । উথৰাৰ স্বামী সুৰযে পূৰ্ব পৰিকল্পিতভাৱে মোনাৰ ভিতৰত সাপডাল ভৰাই আনি শুই থকা পত্নীৰ ওপৰত জাপি দিয়ে । সুৰযে পত্নীক সাপডালে দুবাৰকৈ খুটিওৱালৈকে অপেক্ষা কৰে । ইয়াৰ পিছত সুৰযে সাপডাল জাৰত ভৰাবলৈ চেষ্টা কৰে যদিও বিফল হয় আৰু সাপডাল আলমাৰিত সোমায় । সুৰযে গোটেই নিশা সাৰে থাকি পুৱাই ঘৰৰ পৰা ওলাই যায় । ইয়াৰ পিছতে মহিলাগৰাকীৰ পৰিয়ালৰ লোকে তেঁওক মৃত অৱস্থাত উদ্ধাৰ কৰাৰ লগতে সাপডালো উদ্ধাৰ কৰে ।
ইয়াৰ পূৰ্বেও স্বামী গৃহত উথৰাক সাপে খুটিয়াইছিল আৰু দ্বিতীয়বাৰৰ বাবে পুনৰ অনুৰূপ ঘটনা সংঘটিত হোৱাৰ বাবে পৰিয়ালৰ লোকৰ সন্দেহ হয় আৰু ঘটনা সন্দৰ্ভত এজাহাৰ দাখিল কৰে । আৰক্ষীৰ তদন্তত এই তথ্য পোহৰলৈ আহে যে, ইয়াৰ পূৰ্বেও সুৰযে উথৰাক হত্যা কৰাৰ বাবে বন্ধু সুৰেশৰ পৰা সাপ আনিছিল । উথৰাই নিজৰ প্ৰাণ ৰক্ষা কৰি পলাই যাবলৈ সক্ষম হয় আৰু চিকিৎসালয়ৰ পৰা মুকলি হৈয়ে নিজৰ মাক-দেউতাকৰ ঘৰলৈ যায় ।
উল্লেখ্য যে, অন্য মহিলাক বিয়া কৰাব বিচৰাৰ বাবে সুৰযে নিজ পত্নীক হত্যা কৰে বুলি জানিবলৈ দিয়ে আৰক্ষীয়ে ।
লগতে পঢ়ক- চিৰাঙত আৰক্ষীৰ জঘন্য কাণ্ড : প্ৰহাৰ কৰিলে স্বাস্থ্যকৰ্মীক
